Elkartasun Eguna antolatu du Etorkizunaren Alde plataformak

Futbito txapelketarekin batera herri bazkaria ere antolatu dute. Txartelak erosteko azken eguna bihar izango da eta 10 euroan daude salgai.

Ikerne Zarate

Errenteria-Orereta

2017/04/18

Iruñean atxilotutako lau gazteen gurasoen agerraldia joan den hilabetean manifestazioa deitzeko.

Iruñean atxilotuta lau gazte oreretarren aldeko Elkartasun Eguna egingo du larunbatean Etorkizunaren Alde plataformak. Futbito txapelketarekin batera (Miguel Irastorzan jokatuko da) herri bazkaria ere antolatu dute. Azken horretarako txartelak erosteko azken eguna bihar izango da eta 10 euroan daude salgai. Xenpelar Bertso Eskolako bertsolariek emango diote segida elkartasun egunari eta amaitzeko, kontzertuak antolatu dituzte gaztetxean. Sarrerak 5 euro balio ditu. Kontzertuetarako zein bazkarirako txartela bateratua erosteko aukera dagoela esan dute antolatzaileek, 12 euroan. Informazio gehiago jasotzeko, 688 81 77 13 telefono zenbakira dei dezakete interesdunek. Martxoaren 9an atxilotu Lau oreretarrak martxoaren 11n atxilotu zituen Espainiako Poliziak Iruñean izandako liskarren harira. Horietatik hiru espetxeratzeko agindua eman zuen epaileak bi egun beranduago desordena publikoa eta terrorismoa egotzita, eta Espainiako Auzitegi Nazionalera bideratu zuen auzia. Laugarren gaztea, atxilotu eta ordu batzuetara utzi zuen aske poliziak adin txikikoa delako. Joan den astean, defentsaren helegite bat aintzat hartuta, Nafarroako Auzitegiak baztertu egin zuen «terrorismo» delitua, eta, beraz, istiluak Iruñeko instrukzioko laugarren auzitegian ikertu behar direla erabaki du. Autoa irmoa da. Behin-behineko espetxealdia eteteko ere eskatu zuen defentsak aurkeztutako helegitean. Hori ez du onartu auzitegiak. Iruñeko espetxean daude hiru oreretarrak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.