Axolagabetasunaren kontra
Caritasek erakusketa antolatu du Zirizan, bitarteko grafikoen bidez, gizarte bazterketaren gaia jorratu eta jendartea sentsibilizatzeko.
Gipuzkoako Caritasek 50 urte bete ditu, eta hainbat jarduerekin ospatzen ari da urteurrena, tartean, datorren astelehenean Trintxerpeko Ziriza etxean zabalduko duten erakusketa. San Pedroko eta Trintxerpeko elizbarrutietako Caritasek antolatu du erakusketa “pobreziaren errealitatea eta gizarte bazterkeria ezagutarazteko” helburuz.
Erakusketak Aparkatu zure axolagabetasuna izena du, eta herritarrak sentsibilizatu nahi ditu, bazterkeria egoeraren berri modu ezohikoan eskainiz. “Pobrezia eta gizarte bazterkeriaren aurpegi ezberdinak” irudikatuko dituzte erakusketan, “era erraz baina zuzen batean, panel eta elementu grafiko eta bisualen bidez”. Etxerik gabeko pertsonen, migratzaileen edo buruko gaixotasunak dauzkatenen errealitateak azaldu dituzte, besteak beste.
“Erakusketa honen bidez, jarduteak duen garrantziaz sentsibilizatu eta kontzientziatu nahi dugu jendea” azaldu dute antolatzaileek, “norbaiten bizitza hobetzea norberaren esku dagoela” sinetsita. “Gure bizitzeko, jarduteko eta jokatzeko moduarekin gure inguruan aldaketa positiboak eragin ditzakegu”, gaineratu dute.
Erakusketa Ziriza etxean egongo da zabalik hilaren 24tik (astelehena) 30era, 18:00etatik 20:00etara astelehenetik ostiralera, eta 11:30etik 13:30era larunbatean eta igandean. 
