San Marko Eguna korrika ospatuko dute askok aurten ere

EATek antolatuta San Markoko Igoera lehiatuko da etzi; Bizarain mendiaren inguruetatik barrena igaroko da 600 metroko desnibela duen proba.

olatz mitxelena

Errenteria-Orereta

2017/04/21

Leire Elosegi, lasterketa irabazi zuen urtean.

Ez da hain aspaldikoa, baina ohitura sustraitzen ari da. Gero eta gehiago dira Errenteria-Oreretan San Marko Eguna korrika ospatzen dutenak. Erromeriarekin bat eginez, San Markoko Igoera antolatzen du urtero Errenteriako Atletismo Taldeak (EAT) 2006az geroztik, eta, aurtengoan ere ez du hutsik egin. Etzirako antolatu dute mendi lasterketa. 09:30ean hasiko da igoera. Irteera Errenteriako Herriko Plazan egongo da, eta helmuga, noski, Bizarain mendian. Guztira, 11.500 metro izango ditu probak, ederrak baina malkarrak, 600 metroko desnibel metatuarekin. 16 urtetik gorakoek parte hartu ahal izango dute proban, federatuak izan ala ez, baina plaza kopurua mugatua dela aurreratu dute antolatzaileek. Gehienez 300 parte hartzaile onartuko dituzte. Plaza kopurua aurrez betetzen ez bada, egunean bertan ere egongo da izena emateko aukera. Inskripzioak 15 euro balio du, eta Internetez ere egin daiteke. Dortsalak, azkenik, lasterketaren egunean bertan banatuko dituzte, 08:00etatik aurrera, Herriko Plazan bertan. Sari banaketa 11:00etan izango da sari banaketa, helmugan, Bizarainen, San Marko Egunaren harira (25ean da) propio antolatutako erromeriaren testuinguruan, festa giroan. Sexu bakoitzeko lehenengo hiru sailkatuentzat garaikurra eta sari bereziak egongo dira. Horrez gain, hiru hornidura postu prestatuko dituztela iragarri du EATk: helmugakoa eta beste bi. Postu horietan produktu energetiko eta freskagarriak eskainiko dizkiete parte hartzaileei, besteak beste, ura, fruta, barrak, eta edari energetikoak. Lasterketa bere zatirik handienean edertasun natural handiko parajeetatik igarotzen da eta, hori horrela izanik, ingurunea ahal bezai n beste zaintzeko eta zaborrak kontrol guneetatik kanpora ez botatzeko eskatu diete antolatzaileek parte hartzaile guztiei.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.