Guztira, 361 eskaera kudeatu ditu Oarsoaldea Garapen Agentziak, eta lan poltsan izena emanda dauden 143 lagunetik hamarrek aurkitu dute lana.
Martiarena, Lopez Etxezarreta eta Leonet gaurko agerraldian.
Joan den abenduan abiatu zuten Oarsoaldeak eta Errenteria, Oiartzun, Lezo eta Pasaiako udalek Etxeko-Lan zerbitzua. Lau hilabetean pozik daude programak eman duenarekin. Guztira, 361 eskaera kudeatu ditu Oarsoaldea Garapen Agentziak, eta lan poltsan izena emanda dauden 143 lagunetik hamarrek aurkitu dute lana.
Lau hilabetean jasotako datuekin pozik azaldu dira zerbitzuaren sustatzaileak eta hala azaldu dute gaur egin duten agerraldian, Jexux Leonetek Oiartzungo alkate eta Oarsoaldea Garapen Agentziaren lehendakariak, Garazi Lopez Etxezarretak errenteriako zinegotziak eta Jesus Maria Martiarenak Lezoko alkateak. Etxeko edo zaintza lan egin nahi duten pertsonen lan poltsa osatzea da zerbitzuaren helburua, eta baita pertsona horiek behar bezala prestatzea lan horietarako ikastaro eta formazio saioen bidez.
Horrekin batera, zerbitzua behar duten familiei ere erantzun nahi die Etxeko-Lan zerbitzuak, bitartekaritza eta aholkularitza emanda. Datu zehatzak eman dituzte gaurko agerraldian. Langileen kasuan, 143 lagunek eman dute izena lan poltsan; 35 laguni aholkularitza zerbitzua eman die Oarsoaldeak; 92k azaldu dute prestakuntza ikastaroetan parte hartzeko interesa, eta izena eman dutenen artetik hamar lagunek lana aurkitu dute.
Zerbitzuaren eskatzaileen kasuan berriz, 72 familiari aholkularitza zerbitzua eman dio Oarsoaldeak; 19 lan eskaintza kudeatu ditu.
Emakumeak nagusiki
Etxeko zein zaintza lanetan nagusiki emakumeak ibiltzen direla zehaztu dute bestalde, “askotan etorkinak izaten dira”. Datuek berresten dute azken hori: lan poltsan izena eman dutenen %90,21 emakumeak dira, eta horietatik %57,53 etorkinak. Lan poltsetan izena emandakoen artean erregularizatu gabe dauden zortzi kasu topatu dituzte. Bestalde, bitartekaritza zerbitzuari esker, aholkularitza eman zaien 72 familien artean, 14 lan eskaintzetan diskriminazio egoerak jaso direla jakinarazi dute.
Momentuz lau ikastaro bideratu dituzte eta arrakasta gehien izan duena ziurtagiri profesionalen gainekoa izan da, “65 pertsonek dute egiteko interesa. Izan ere, dependentzia legearen barruan diru laguntzak jaso ahal izateko horrelako lanetan dabiltzan pertsonek titulazio berezia izan behar dute 2018ko urtarrilaren hasierarako”.
Euskara ikastarorako 31 pertsonek eman dute izena; gaitasun sozialak lantzeko ikastarorako 24 lagunek; eta sukaldaritza ikastarorako, 22k.
Etxeko-Lan zerbitzuan parte hartu nahi dutenek Oarsoaldeak Olibeten dituen bulegoetara jo behar dutela gaineratu dute astelehenetik ostiralera 08:30etik 14:30era edota 943 51 02 00 telefono zenbakira deitu.
