'Erabateko gardentasuna' lortzeko jauzia egin du udalak

Errenteriako udalean gardentasuna erabatekoa izatea, eta herritarra ardatz izango duen administrazio lortzeko urratsa egin dute.

Ikerne Zarate Gartziarena

Errenteria-Orereta

2017/04/28

Collar, Mendoza eta Karrikiri agerraldian.

Errenteriako udalean gardentasuna erabatekoa izatea, eta herritarra ardatz izango duen administrazio lortzeko urratsa egin dute. Agerraldia egin dute horren berri emateko gaur Julen Mendoza alkateak, eta Jaione Karrikiri eta Jon Collar zinegotziek. Berrantolaketa prozesua eskatuko du egindako urratsak “ondorio sakonak eta epe luzerakoak izango dituenak”, Mendozaren hitzetan. Hiru arlotan ari da lanean udala: administrazioa berritzen ari da garai berrietara egokitzeko; aurrekontuak osatzeko prozedura moldatzen ari da, diru publikoa modu eraginkorragoan erabiltzeko; eta azkenik, herritarrak artatzeko HAZ zerbitzua prestatzen ari da. Mendozak azaldu duenez, “lehenengo bi prozesuak barne lanarekin lotuta daude, baina eragin zuzena dute hirugarrenean”. Garai berrietara moldatu nahi dute udala, “orokorrean, pasa den mendeko egiturekin funtzionatzen dute administrazio publikoek”. Horren harira, “sekulako sinplifikazio lanketa” egiten ari dela udala esan du Mendozak, “koordinazioa erraztu eta ikuspegi integrala lortzeko. Gainera kudeaketa txostenak aurkeztuko dira hilero alderdi politikoei eta herritarrei begira, batzuek zein besteek udalaren jardun politikoa eta emaitzak fiskalizatu ahal ditzaten”. Ohiko batzordeak desagertu eta hiru esparru handi sortuko ditu udalak horretarako: Herritarra, lurraldea eta antolaketa. Aurrekontu publikoaren erabilera arduratsua Helburuetara lotutako aurrekontuak egitea du udalak bigarren erronka. “Gastua kontrolatuagoa egotea ekarriko du horrek, eta baloratzen errazagoa izango da”. HAZ, herritarrak artatzeko zerbitzua da hirugarren arloa. 2018ko urtarrilean nahi du jarri martxan udalak zerbitzu hori udaletxearen lehen solairuan eta horretarako lanak egitea aurreikusi dute. Zerbitzuaren bidez herritarrek egin beharreko kudeaketak arindu nahi dituzte. Udalak administrazio “eredu berri bat” sortzea helburu duten “sakonera handiko” neurriak bultzatzen ari dela esan du azkenik Mendozak: “Administrazio moderno, gardena, zerbitzu bat ematen duela jakitun eta XXI. Mendeko herritarrengana moldatuko dena”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.