Igoera bai, eta liga ere bai
3-5 irabazi diote antxotarrek Aretxabaletari.
Liga irabazi du Antxoko Areto Futbol Taldeak. Denboraldia bukatzeko partida baten faltan, eta bere arerio zuzenari 3-5 irabazita gailendu dira asteburuan zuri-gorriak, Aretxabaletan.
Garaipen bikoitza erdietsi dute aurten, beraz, antxotarrek; igoera eta liga. Euskal Ligako Lehen Mailan lehiatu da aurten taldea, eta datorren urtean Espainiako 3. Mailan ariko dira, euskal taldean.
Herrian festa, larunbatean
Datorren larunbatean du azken partida Pescados Ferreres taldeak, etxean, Mallabia Seguros Altadiren kontra, 18:00etan, eta egun berean ospatuko dituzte liga titulua eta igoera, herritarrekin batera, Antxon antolatutako festan. “Euskal ligako azken partida jokatuko dugu etxean 18:00tan eta omenaldi txiki bat egin nahi dizuegu astero astero taldea animatzen duzuen gazteoi”, adierazi dute taldeko arduradunek.
Zehaztu dutenez, Haurren Eguna prestatu dute horretarako. Jolasak antolatu dituzte goizean, Biteri plazan, eta eguerdirako herri bazkaria, Gure Zumardian. Bazkarirako txartelak salgai daude Dani, Mimos eta Kamio tabernetan, 3 euroan.
Arratsaldean, zaleekin batera, denboraldiko azken partida lehiatzera abiatuko dira jokalariak, Donibaneko kiroldegira, zaleak lagunduta. Han ere, sorpresak agindu dituzte zale gazteenentzat.
