Gaur aurkeztu dute iazko memoria kultur faktorian, eta proiektuak inguruan izan duen inpaktu ekonomikoaren berri eman dute.
Xabier Agote, Izaskun Gomez eta Denis Itxaso, Albaolan, memoriaren aurkezpenean.
Ia 50.000 bisitari jaso ditu iaz Albaolak, zehazki 49.289. Orain dela bi urteko datuekin alderatuta (2015. urtean 38.157 bisitari jaso zituen ) gorakada %30ekoa izan da, eta honenbestez Gipuzkoako hirugarren ekipamendu bisitatuena da.
Gaur eman dute ezagutzera datua, Albaolan,
iazko memoriaren berri emateko deitutako prentsaurrekoan. Albaolako presidente Xabier Agotek, Pasaiako alkate Izaskun Gomezek, eta kultura diputatu Denis Itxasok hitz egin dute.
Agotek nabarmendu duenez, “iazkoa urte erabakigarria” izan da Albaolarentzat, Diputazioaren eta Eusko Jaurlaritzaren babesa lortuta, jauzi kualitatibo eta kuantitatibo garrantzitsua eman ahal izan dutelako bere egitasmoaren gauzatze bidean.
Agotek nabarmendu duenez, bi helburu nagusi ditu elkarteak: Euskal Herriko itsas ondarea hemen zein nazioartean ezagutzera ematea, eta, proiektuaren bitartez badiaren garapen sozio ekonomikoa sustatzea.
Euro bakoitzeko ia bi
Bide beretik Izaskun Gomezek Albaolaren proiektuak izan duen inpaktu ekonomikoa nabarmendu du. Pasaiako alkateak zehaztu duenez, Gipuzkoako ekonomian sortutako eragin zuzena 556.095 eurokoa izan da eta potentziala, aldiz, 3.089.962 eurokoa. “Finantzazio publikoko euro bakoitzeko 1,95 euro sortzen ditu Albaolak”, ohartarazi du.
Albaolaren aurrekontua osoaren %50 erakundeek finantzatzen dute; %25a Albaolak berak sortutako etekinetatik eratorria da (bisitariak eta bestelako diru sarrerak), eta gainontzeko %25 inguruko enpresa pribatuen ekarpenetatik lortzen dute.
353 boluntario lan egiten dute gaur egun Albaolan, (%17 igo da urtebetean boluntarioen kopurua), eta gero eta emakume gehiagok parte hartzen dute.
Azkenik proiektuak duen dinamismoa, eta nazioartean zein hedabideetan lortu duen oihartzuna nabarmendu dute.
“Proiektu hau oso garrantzitsua da Gipuzkoarentzat”, ohartarazi du Denis Itxasok, esan duenez, “proiektu hau prozesu bat” delako eta “prozesuak berak duelako interes handia”.
