Ateak Zabalduz! astea antolatu dute bosgarrenez Errenteria-Oreretako jubilatuen zortzi elkarteek, Lagunkide taldeak eta Errenteriako Udaleko Gizarte Zerbitzuen azpisailak.
Ateak Zabalduz astearen bosgarren aldia aurkeztu dute Merkatuzarren.
Ateak Zabalduz! astea antolatu dute bosgarrenez Errenteria-Oreretako jubilatuen zortzi elkarteek, Lagunkide taldeak eta Errenteriako Udaleko Gizarte Zerbitzuen azpisailak. Helburua, astebetez egitarau oparoa eskaintzea herritar orori, eta urtean zehar elkarteetan ehunka jubilatuk egiten dituzten lanak ikusgai jartzea. Gaur aurkeztu dute datorren astelehenean, hilak 22tik, hilaren 26ra arte egingo duten astea Merkatuzarren Nagore Basurto Ongizate zinegotziak eta jubilatu elkarte guztietako ordezkariek.
“Egun jubilatu asko aritzen da elkarteetan, mugimendu handia dago horien inguruan eta ekarpen oparoa egiten diote herriari”. Astelehenean jubilatuek herriko elkarteetan egindako lanen erakusketa zabalduko dute Merkatuzarren. Denetarik ikusteko aukera izango da 10:00etatik 13:00ak arte. Egun berean antolatu dute, arratsaldez, eskuko telefonoen gaineko tailerra: “Oso erabilgarri eta lagungarriak dira adineko jendearentzat, baina askotan zailtasunak ditugu erabiltzeko”, esan du Beti Bizkor elkarteko Nieves Apeztegiak. WhatsApp aplikazioaren gainean ariko dira Vodafone Fundazioaren laguntzaz. 16:00etatik 17:30era eta 18:00etatik 19:30era izango dira tailer horiek.
Dantza saioa, sukaldaritza osasungarriaren gaineko tailerra, kirol jarduerak, eskulan tailerra, omenaldia, bazkaria… denetarik antolatu dute, eta ekitaldi guztiak dira doakoak eta publiko guztiari irekiak, bazkaria izan ezik. Horretarako txartela erosi beharko dute.
Bisita kulturala ere antolatu dute astearen barruan. Herriko lantegien gainekoa izango da, “bata tradizionala eta bestea berritzaileagoa”, esan du Caridad Migeltorenak Lagunkidekoa. Migueltorean da beteranoena, 90 urterekin. Izan ere, Papresa bisitatuko dute lehenik, eta ondoren, Torrekuara joango dira Fabrika Kreaktiboa bertatik bertara ezagutzera. 10:00etatik 13:00etara izango da hori. Arratsaldean berriz, Euskal Jaiarekin jantziko dituzte kaleak Merkatuzarretik abiatuta 17:00etan.
Egitaraua
Astelehena, 22
- 10:00-13:00: Erakusketa antolatuko dute eta bisitatzeko aukera izango da Merkauzarren.
- 16:00-17:30: Eskuko telefonoaren erabileraren gaineko tailerra Merkatuzarren.
- 18:00-19:30: Eskuko telefonoaren erabileraren gaineko tailerra Merkatuzarren.
Asteartea,23
- 11:00-13:00: Munduko dantzen tailerra.
- 17:30-19:30: Sukaldaritza tailerra.
Asteazkena,24
- 10:00-13:00: Bisita Kulturala Papresa lantegira eta Fabrika Kreaktibora.
- 17:00-20:00: Euskal Jaia Merkatuzarretik abiatuta.
Osteguna,25
- Kirol Jarduera Galtzaraborda Kiroldegian.
- 17:00-20:00: Eskulan tailerrak.
Ostirala,26
- 11:30-12:30/ 16:30-19:30: Omenaldia Lagunkide udal zerbitzuko taldeei, bazkaria, emanaldiak eta dantza.
