Karmengo Ama eskolako lanak atzeratu dituztela salatu du EH Bilduk

DBH ezartzeko egokitze lanak udan egingo zituztela uste zuten ikastetxean, baina urte bukaerara arte ez direla hasiko jakinarazi diete lehengo astean.

olatz mitxelena

Pasaia

2017/05/18

Koalizioak gurasoen bidez jaso du albistea, eta ikastetxeko zuzendaritzak baieztatu die.

Urte luzeetako borrokaren ondotik, iaz, Trintxerpeko Karmengo Ama Ikastetxeak bere zentroan DBH ezartzea lortu zuen. Iazko ekainean eman zien baiezkoa Eusko Jaurlaritzak, eta erabakiak poz handia eragin zuen Pasaian, are gehiago sare publikoko zentro bakarra dela kontuan hartuta. Hurrengo pausoa, baina, eraikinaren egokitzea behar zuen, eta egokitze lan horiek uda honetan egingo zituztela aurreikusia zuten ikastetxean, ikasleei ahalik eta gutxien eragin ziezaien. Baina lanak atzeratu dituztela jakinarazi du gaur Pasaiako EH Bilduk: “Pasaiako EH Bilduk gurasoen bidez jakin duenez, eta ikastetxeko zuzendaritzak baieztatu digunez, joan den astean, inolako arrazoirik eman gabe, Eusko Jaurlaritzak jakinarazi zien obra hori urte amaierara arte atzeratuko duela”. Erabaki honek, egokitzapena atzeratzeaz gain, obrak ikasturte erdian egitea dakarrela salatu du koalizioak, eta horrek ikastetxeko ordutegian nabarmen eragingo duela salatu dute, Lehen Hezkuntzako eskola-ordu guztiak goizez eman beharra eragiteraino, “15:00ak arte, modu intentsiboan”. Pasaiako EH Bildurentzat “gertaera honek, berriz ere, agerian uzten du EAJ eta PSEren Eusko Jaurlaritzak Pasaiako etorkizunarekiko duen konpromisorik eza”, eta ikastetxeko zuzendaritzarekin eta gurasoekin batera borrokan jarraitzeko asmoa agertu du, “obra hau atzera ez dadin”. Norabide horretan, koalizio pasaitarra Eusko Legebiltzarrean duen taldearekin jarri da harremanetan, eta galderen bitartez, hezkuntza sailburu Cristina Uriarteri gaur bertan azalpenak eskatuko dizkiotela iragarri du. Eusko Jaurlaritzari galderak

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.