Herri kultur anitza izatetik, kulturarteko herria izatera jauzi egin nahi du Errenteriak

Igandean Kultur Aniztasunaren Nazioarteko Eguna izango da, eta horren harira, adierazpena egin du Errenteriako Udalak.

2017/05/19

Gaur egin dute Errenteria 11 Kolore aniztasunaren aldeko martxaren aurkezpena.

Igandean Kultur Aniztasunaren Nazioarteko Eguna izango da, eta horren harira, adierazpena egin du Errenteriako Udalak. Kultur aniztasuna “balio positiboa” dela dio adierazpenak, “herritarren kultur aniztasunak gure herria leku hobea egiten du. Horregatik, herri kultur anitza izatetik kulturarteko herria izatera pasatzearen aldeko apustua egin dugu”, eta kultura guztien arteko harremana beharrezkoa dela, “elkar aberastu dezaten”. Errenteria-Oreretako herritarren arteko aniztasunari erreparatuta 2015ean Kultur Aniztasuna azpisaila sortu zuen udalak, eta iaz berriz, lehenengoz ospatu zuen Kultur Aniztasunaren Nazioarteko Eguna, “munduari erakusteko Errenteriak duen aberastasun handienetako bat”. Aurten, elkarbizitzarako lan mahia jarri du martxan elkarteetako ordezkarien partaidetzarekin: “Helburua, ezagupenak partekatzea eta Errenteria kulturarteko herri eredu bihurtzeko bidea hastea da”. Errenteriako Udaleko alderdi guztiek babestuta, hiru konpromiso hartu dituzte: Bizikidetzarako mahaiarekin lanean jarraitzeko konpromisoa hartu dute, “kulturarteko hiriaren bidean”; RECI Europako Kulturarteko Hirien Sareari atxikitzea aztertuko dute; eta kulturarteko bidean lan egiten duten eragileen lana sustatuko dute. Gaur bertan kultur aniztasunaren gainean egingo diren ekintzetan pate hartzera deitu dituzte herritar guztiak, eta eskerrak eman dizkiete elkarbizitzarako lan mahaian lanean ari diren elkarteei, “Errenteriarekin erakusten duten konpromisoagatik”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.