Gezala auditorioak aldagelak izango ditu

Gezala auditorioan egin beharreko zabalkundeaz gain, udalak jakinarazi du kultur ekipamenduetarako lokala erosi duela herriko taldeentzat.

Urko Etxebeste Petrirena

Lezo

2017/05/23

Gezalaren sarrera ondoan, Herri Eskola aldera, jarriko dituzte aldagelak.

Lezo Herri Eskolako jolastokian estalkia eraikitzearekin batera, Lezoko Udaleko gobernu taldearen asmoa da beste ekipamendu bat eraikitzea ingurune horretan: aldagelak egin nahi ditu. Jada idatzia dago proiektua, eta udan abiatu nahiko lukete. Laster esleituko dira eraikitze lanak. Kultur azpiegiturarekin lotuta joango litzatekeen espazio berriaren funtzioa izango da Gezalan edozein kultur ekitaldi egiten dutenen beharrei hobeto erantzutea, “beren ikuskizunak eskaintzen dizkiguten bertako zein kanpoko talde amateur edo profesionalen baldintzak hobetzeko eraikiko ditugu, taldeetako kideek gauzak non utzi, non aldatu eta eszenatokira igo aurretik lasai egoteko espazio bai izan dezaten”, zehaztu dute udaletik. Aldi berean, udalak jakinarazi du kultur ekipamenduetarako lokal bat erosi berri duela, herriko dantza eta antzerki taldeek erabil dezaten, “orain arte ez bezala, non entseatu eta materiala non utzi izan dezaten”. Jesus Mari Martiarena alkateak gidari duen gobernu taldeak azaldu duenez, euren lan ardatz nagusietakoa da “herriko kultur taldeei babesa ematea eta udalerrian kultur jarduera sustatzea, helburu hartuta herriari nortasuna ematea, herritarrei aukera ezberdinak eskaintzea eta kultur eskaintza zabaltzea”. 2017ko aurrekontuetan zeregin horretarako diru partidak daude aurreikusita.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.