Gogorzari 100.2 artikulua ezartzeko eskatu dute Orereta Ikastolako langileek

Euskal gizartearen gehiengo sozial, politiko eta sindikalak "aldarrikapen horrekin" adostasuna erakutsi duela erantsi dute Orereta Ikastolako langileek.

Ikerne Zarate Gartziarena

Errenteria-Orereta

2017/05/24

Aitzol Gogorza larri dagoen preso oreretarraari 100.2 artikulua ezartzeko eskatu dute Orereta Ikastolako langileek.

Orereta Ikastolako langileek Aitzol Gogorza larri gaixo dagoen euskal presoa etxeratzeko eskatu dute. Ikastola horretako ikasle izan zen Gogorza. Horretarako, gaixotasun larri eta sendaezinak dituzten presoentzat espetxe araudiak aurreikusia duen 100.2 artikulua ezartzeko eskatu dute zehazki. Agiria sinatu dute eta bertan, ez direla epaileak, ez politikariak ezta medikuak ere esan dute, “gu irakasleak gara, langileak, hezitzaileak, eta etorkizuneko gizarte justu baten alde lan egiten dugu; baita Aitzolen eskubideen alde ere, hori dela eta, 100.2 artikuluaren aplikazioa eskatzen dugu”. Gogorzak bizi duen egoera “oso larriak”eraman dituela agiria sinatzera azaldu dute. Euskal gizartearen gehiengo sozial, politiko eta sindikalak “aldarrikapen horrekin” adostasuna erakutsi duela erantsi dute, “eta guk ere bat egiten dugu horrekin. Gogorzak bizi duen egoerarekin amaitzeko eta hain beharrezkoa konponbide egoera lortzeko, aurrera pausuak emateko unea dela pentsatzen dugu. Horretarako, bakoitzaren ideologia errespetatuz eta ezberdintasunak alde batera utziz, goazen indarrak batzera pertsona ororen eskubideak errespetatuak izateko, eta Aitzol eta bere gertukoek pairatzen duten sufrimenduari amaiera emateko”. Egun indarrean dagoen espetxe politika arbuiatu dute eta eskubide urraketa sistematikoa dakarrela salatu dute: “Sakabanaketa eta urrunketa, larri gaixorik diren euskal presoak, zigorren batuketa eza, isolamendua, bakartzea… salbuespen legedia da”. Gogorzak hemeretzi urte daramatza preso, eta une honetan Basauriko espetxean dago. Azken urteetan 25 aldiz baino gehiagotan ingresatu dute ospitalean gaixotasunaren ondorioz, horietako bitan, tronbolismo baten ondorioz.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.