Lezo hankaz gora izango da larunbatean. Allerruk Preferentera igotzeko itzuliko partida jokatuko du Zumarragan, eta 2-1eko aldea defendatuko du.
Partidara joateko autobusaren kartela.
Lezo operazioa-ren lehen zatia joan den larunbatean izan zen Plazeta futbol zelaian. Ohorezko Preferentera igotzeko kanporaketako lehen norgehiagoka, joanekoa, 2-1 irabazi zion Allerruk Zumarraga-Urretxuko Urolari. Emaitza hobea izan zitekeen, 2-0 aurreratu zirelako lezoarrak bigarren zatian, baina kanpokoek duten indarra baliatu, eta Allerru hoberen zegoenean 2-1ekoa egin zuten. Ez da emaitza guztiz txarra, baina erne ibili beharko dira, oso adi, lezoarrak etzi (larunbata) itzuliko partidan: Argixao zelaian da, 17:30ean hasita.
Eta azken aldian mezuak herriz herri zabaltzen dituzten autobusen antzera (laranjak, moreak), lezoarrek larunbatean berde koloreko bat (sentimenduan behintzat) eramango dute herritik Argixaoraino. Mezu argi batekin: Allerru Preferentera doa. Hori da
Lezo operazioa II-ren mezua, jokalariek zaleen babes osoa izango dutela mailaz igotzeko partida erabakiorrean. Hori bai: autobus berdea ezingo dute lezoarrek euren atearen aurrean jarri Urolaren golak eragozteko, hori debekatuta dago, ustelkeria kasutzat joko lukete.
Joanekoan bezala, elastiko eta bandera berde eta zuriak ez dira faltako. Autobus bat behintzat aterako da Lezotik eta herritar askok euren ibilgailu propioa erabiliko dute Zumarragara joateko. Zabarreren lehorreratze antzekoa izango da.
Talde sendoa da Urola. Joko zuzena egiten du. Ondo jarrita egon ohi dira jokalariak, eta falta, korner eta antzerako jokaldiak ondo erabiltzen dituzte, horietan sortzen diren bigarren jokaldiak ondo baliatuz. Hori ondo dakite zuri-berdeek. Gol bat sartuko balute Alerrukoek, kanporaketaren balantza euren alde nabarmen jarriko litzateke.
Lezotik autobusa larunbateko 15:00etan aterako da. Tokiaren erreserba Plazetan egin behar da (helduek 10 euro, haurrek 5). Denek bultza dezatela autobusa eta taldea igoerara!