Jai parekideagoak nahi dituzte Oarsoaldeko lau udalerriek

Errenteria, Lezo, Oiartzun eta Pasaiako udalek, jai parekideago eta barneratzaileagoak lortzeko asmoz, iniziatiba berria jarri dute martxan elkarlanean.

Ikerne Zarate Gartziarena

Errenteria-Orereta,Lezo,Oiartzun,Pasaia

2017/05/30

Irudian madalenetako txupinazoa.

Oarsoaldeko lau udalerrietan jaien testuinguruan ere emakumeen eta gizonen berdintasuna sustatzeko eta jarrera matxistak gaitzesteko iniziatibak eta kanpainak egin dituzte. Horietako batzuk, modu bateratuan antolatu dituzte lau udalek Berdintasunerako Mahai Teknikotik. Hasitako bideari jarraipena eman nahi diote orain Errenteria, Lezo, Oiartzun eta Pasaiako udalek, jai parekideago eta barneratzaileagoak lortzeko asmoz, eta horri begira iniziatiba berria jarri dute martxan elkarlanean. Helburu nagusia Oarsoaldeko jaiak genero ikuspegitik aztertzea da, eta indargune eta ahuleziak kontuan hartuta plangintza bat lantzea jaiak parekideago eta barneratzaileagoak egiteko. Prozesua abiatu dute dagoeneko eta lan hori egiteko Elhuyar Aholkularitzaren laguntza dute lau udalek. Oiartzun, Errenteria, Pasaia eta Lezoko izaera ezberdineko hainbat jai aukeratuko dituzte aztertzeko, “kultura, gastronomia, usadio paganoekin… lotura duten jarduerak aztertuko ditugu, eta lanketa horretan Oarsoaldeko jaietan zeresana duten mota ezberdinetako eragileak inplikatu nahi ditugu”. Azterketa egiteko beharrezkoa duten informazioa ordezkari politiko, udal teknikari, kultur elkarte, elkarte gastronomiko eta kolektibo feministetatik eskuratuko dute eragile horiekin egingo dituzten elkarrizketen bidez. Horrekin batera jaien gaineko komunikazioa eta dokumentazioa aztertuko dute, eta festa zein dinamika jakinen behaketa egingo dute. Ez dute horretara mugatu nahi ordea, eta herritarren iritziak ere izango du leku azterketa horretan. Ekarpenak jasotzeko talde gogoetak antolatu dituzte horretarako lau herrietan. Errenteria-Oreretan, uztailaren 5ean egingo dute saioa 18:00etatik aurrera Merkatuzarren; Oiartzunen, iraila amaieran; Pasaian, iraila amaiera eta urriaren hasiera artean; eta Lezon, urriaren hasieran. Prozesuaren eta bilera deialdien xehetasun gehiago emango dituzte datozen asteetan, baina edozein zalantza argitzeko udaletako Berdintasun sailekin harremanetan jar daitezke interesdunek: Errenteriako Berdintasun saila, 943 44 95 76; Pasaiako Berdintasun saila, 943 00 43 20; Lezoko Berdintasun saila, 943 52 10 94; Oiartzungo Gizarte Zerbitzuak, 943 49 05 52.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.