Partaidetzazko Aurrekontuen prozesuan erabakitzen dena betetzen dela zorrotz zainduko duela iragarri du koalizio abertzaleak.
San Pedroko udal aretoan, barrutiko behar sozio kulturalen gainean egin zen parte hartzea.
Martxan da Pasaian
partaidetzazko aurrekontuak adosteko prozesua, astelehenetik. Ostiralean aurkeztu zuten prozesua, Arizabalon, eta gaur, Pasaiako EH Bilduk “bere irakurketa” plazaratu du abiatu berri duten parte hartze prozesuaren gainean.
“Zinez pozten gaitu EAJk eta PSE-EEk halako pausua eman izanak eta herritarrekin udal gaiak lantzen hasi izanak, inoiz ez delako berandu”, adierazi dute. Izan ere, koalizioak gogora ekarri du iraganean Pasaian koalizio abertzalearen gidaritzapean egin diren bestelako parte hartze prozesu askoren ondorioak, udal gobernuak “tiraderan gordeta” dituela.
Zehazki Antxo Eraikiz, eta Ondartxori buruzko parte hartze prozesuak ekarri dituzte gogora, baita kaiko Herreraren ordenazioaren gainekoa ere. “Udal gobernuak kontuan hartu beharko luke prozesu horietan Pasaiako herritar askok hartu zutela parte, eta haien ilusio, gogo eta ahaleginak ere tiradera horietan dauzkatela”, gaineratu dute. Horregatik prozesu haietan adostutakoak berreskuratzeko eskatu diote gobernu taldeari: “Udal gobernuak benetan herritarren parte-hartzean sinisten badu, tiradera horiek ireki eta herritarren proiektuak aurrera eraman beharko lituzke, bestela,
aurreko asteko argazkia itxurakeria hutsa dela egiaztatuko litzateke”, gaineratu dute.
Bien bitartean, aurrekontuen inguruko prozesuan, “gobernuari erabateko gardentasuna” exijituko diotela agindu dute, “bai herritarrekiko baita, orain arte ez bezala, oposizioko alderdiekiko ere”. Era berean, prozesuaren ondorioak errespetatzeko eskatu diote gobernuari, “nahiz eta bere interesen kontrakoak izan”.
EH Bilduk “Pasaitar guztiei dei egin die prozesuan parte hartzera eta erabakitakoa aurrera eramateko exijitzera, bai prozesu honetan erabakitakoa, eta baita, noski, aurrekoetan erabakitakoa ere”. Azkenik, EH Bilduk, prozesuan erabakitakoak adostutakoak errespetatuko direla “zorrotz” zainduko duela agindu du.
