Munduko Arrozak egingo du SOS Arrazakeriak igandean. Hamasei herrietako ordezkariak eta sei elkarte arituko dira arroza prestatzen.
Munduko Arrozak iniziatibaren bidez kultur aniztasuna agerian jarriko dute.
Munduko Arrozak egingo du SOS Arrazakeriak igandean. Zerealaren bueltan herrian dagoen kultur aniztasuna utzi nahi du agerian iniziatibaren bidez elkarteak, eta kultura horiek guztiak nahastu eta batu. Prestatzeko hamaika modu, beste hainbeste osagai, usain eta kolore dantzan murgilduko dira hamasei elkarte eta beste hainbeste herrietako elkarteetako kideak: Nepal, Maroko, Pakistan, Kolonbia, Brasil, Nigeria, Sahara, Cabo Verde… herri horietan guztietan, besteak beste, arroza nola prestatzen duten ikusteko aukera izango da eta nola ez, dastatzekoa.
Seigarren aldia du iniziatibak Errenteria-Oreretan, eta herriko kultur elkarteek ere egin nahi izan dute bat urtero bezala. Batasuna, Aljarafe, Lau Haizetara Euskaltzaleon Topagunea, Kolore guztiak, Mikelazulo Kultur Elkartea eta Yola elkartea paella-ontziaren bueltan arituko dira. Helburu lehiakorrik ez duela iniziatibak esan zuen atzo Munduko Arrozak aurkezteko egin zuten agerraldian Gerar Carrere SOS Arrazakeria elkarteko kideak: “Ez da lehiaketa izango. Arroz guztiak ezberdinak, baina denak onak dira”. Arroza bezala, kulturak ere ezberdinak direla erakutsiko dute beste behin ere, baina guztiak onak eta horien arteko elkarbizitzaren alde egingo dute.
Goizetik eguerdira antolatu dute egitaraua. 11:00etan elkartuta, ordu erdi beranduago hasiko dira arrozak prestatzen Zumardian. Dastaketa berriz, 13:30ean izango da, eta 2 euroren truke bertaratzen direnek platera eskuratuko dute nahi adina arroz dastatzeko. Haurrei begira jolasak antolatu dituzte. Azken horiek ere Zumardian izango dira, baina eguraldi txarrarekin Agirre Lehendakariaren plazan egingo dituzte.
Munduko arrozak, munduko musiken erritmora kozinatuko dituzte, eta horretarako, musikari guztiei dei egin zien Carrerek: “Musika ekipoa izango dugu, eta instrumentua hartu eta eguna girotzera hurbildu nahi duten guztiek aukera izango dute horretarako”.
Aipamen berezia egin zuen azkenik SOS Arrazakeriako kideak: “Munduko Arrozak egunaren antolaketan zein gure taldean aritu zen Mikel Carcedo (joan den martxoan zendu zen euskaltzale errenteriarra) eta aipamen berezia egin nahi diogu, bere ekarpena taldeari izugarria izan zelako, eta bere falta izugarri sumatzen dugulako”.
Amaitzeko, herritar guztiak animatu zituzten parte hartzera, usain eta zapore dantzan murgiltzera.
