Munduan barrena bidaia, Kontari abesbatzarekin

Kontari proiektuak, Atlas Musikala, musikaz jantzitako ipuina eramango du Madalenaren Basilikara larunbatean.

2017/06/08

Atlas Musikala ikuskizuna emango du Kontarik larunbatean.

Kontari proiektuak, Atlas Musikala, musikaz jantzitako ipuina eramango du Madalenaren Basilikara larunbatean. Kontarin parte hartzen duten 25 haur eta gaztetxoek osatu dute ipuina, eta antzerkiz, musikaz eta kantez jantziko dute ikasturte osoan zehar egindako lana amaitzeko. Hiru abenturazaleen historia kontatu, kantatu eta dantzatuko dute emanaldian, egunerokoaz aspertuta, munduan zehar bidaiatu eta abentura berriak bizi nahi dituzten hiru lagunen ametsa, eta gogor lan egin dute ikuskizuna egi bihurtzeko. Atlas bat, maitagarri bat, eta hamaika abentura batu dituzte Atlas Musikala ikuskizunean. Landarbaso abesbatzaren barruko proiektua da Kontari, eta Maddalen Dorronsoro zuzendariak azaldu duenez, iazko urrian sortu zenetik, kultur aniztasunaren gaia askotan landu dute, “oso presente dugun alorra da, eta mundu osoko txoko guztietako musika eta ipuinak landu ditugu”. Izan ere, kantatuz kontatzen dituzte historiak, eta hala egingo dute larunbateko emanaldian ere. Irene Sotelo narratzaileak gidatuko du abenturaz betetako bidaia, eta ahotsak instrumentuekin lagunduko dituzte. Horren ardura, Amaia Dorronsoro pianistak, Naiara Ibeas flautistak, eta kanpaia modukoak diren tonechime instrumentalistek izango dute. Emanaldia irudiz laguntzeko pantaila ere izango dute emanaldian, eta abenturazaleen bidaia girotzeko Oiartzungo Haurtzaro Ikastolak utzitako hegazkinaren maketa. “Ilusio handiz prestatutako ikuskizuna da, eta haurrek lan handia egin dute” azaldu du Dorronsorok. 20:00 hasiko da bidaia musikala eta sarrera doakoa izango da. Matrikulazioa zabalik Emanaldi honekin amaituko du ikasturtea Kontarik, eta datorren astean hasiko da aurrematrikula kanpaina. Horren harira, hilaren 12 eta 13an entsegu irekiak egingo dituzte Kontari probatu nahi duten 8 urtetik gorako haur eta gaztetxoei begira. Informazio gehiago, Kontariren helbide elektronikora mezua bidalita eskatu dezakete interesdunek. Atlas Musikala bestalde, Maria Magdalena Basilikaren Lagunak kultur elkartearen eskutik dator, eta Jose Luis Insasustik eskerrak eman dizkie Dorronsorori eta Landarbaso abesbatzaren zuzendari Iñaki Tolaretxipiri emanaldia basilikan eskaintzeagatik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.