Galiarrek hartuko dute Gaztaño

Gaztañoko jaiak ospatuko dituzte asteburuan, eta aurten galiarrek hartuko dute auzoa festa giroan murgiltzeko. Asterix, Obelix, eta Ideafixek ez dute kale egingo, ezta Panoramix druidak ere.

Ikerne Zarate

Errenteria-Orereta

2017/06/12

Haurrentzako ere egitarau zabala prestatu dute Gaztañon.

Gaztañoko jaiak ospatuko dituzte asteburuan, eta aurten galiarrek hartuko dute auzoa festa giroan murgiltzeko. Asterix, Obelix, eta Ideafixek ez dute kale egingo, ezta Panoramix druidak ere. Azken horrek prestatuko du parrandari aurre egiteko edabe magikoa. Urtero bezala kontzertua, herri afaria, haur jolasak, txapelketak… antolatu ditu jai batzordeak auzotarren zein kanpotik heldutakoen gozamenerako. Kirolak ere izango du tartea, herri krosa antolatu dute seigarrenez, eta ondoren haur krosa izango da. Bizikleta kronoeskalada ere errepikatuko dute. Herri afari galiarrerako txartelak aste honetan izango dituzte salgai, eta interesdunek, auzo lokal berrira jo beharko dute arratsaldez. 200 lagunentzako prestatuko dute afaria, galiarrez mozorrotuta azaltzeko eskatu dute, eta txartelak 12 euroan salduko dituzte. Kamiseta eskuratu nahi dutenek ere bertara jo beharko dute. Aurten gainera, berritasuna izango dute, karpa jarriko dute auzo sarreran eguraldiak laguntzen ez badu jaiekin gozatzen jarraitu ahal izateko. Jai batzordean 12 lagun ari badira lanean ere, jaietan zehar 70 auzotarren laguntza izaten dute, “ekarpen ekonomikoa egiteaz gain”, azaldu dute antolatzaileek, eta auzotarrei eskerrak eman dizkiete eskainitako laguntzagatik. Amaitzeko, herritar guztiak deitu dituzte jaietan parte hartzera. Sorginen Gaua Sorginen Gaua ere antolatuko dute, bestalde, udako solstizioari ongietorria emateko San Joan bezperan. Herri kirolak haurrentzat, jatekoak eta edatekoak eta ikuskizuna antolatu dituzte sua piztu aurretik. Egitaraua Hilak 16, ostirala

16:00: Futbito 4 txapelketa.
17:30: Eriz Magoarekin hasiko dituzte jaiak.
19:00: Hodei beltzetik lokal berriraino txupinazoa eta Maritxuren jaitsiera zaratatsua. Ondoren Buruhandiak, eta haur jaio berriei aurtengo kamiseta banatuko diete.
Ondoren, Patata tortilla txapelketa.
20:00: Iratxo iturria zabalduko dute bertatik sagardoa edateko.
20:00: Futbito 4 txapelketaren finala.
23:00: VI. Gaztañorock kontzertua: Stepi eta lagunak, Autobus Magikoa, Korumba, eta Pangea.

Hilak 17, larunbata

10:30ean: Gaztañoko VI. Herri Krosa. Jarraian, V. Haur krosa.
12:00: Bizikleta kronoeskalada.
16:00: Mus Txapelketa Bukagaitz elkartean.
17:00: Haur jolasak.
19:00: Matraka elektrotxaranga.
21:: Galiar herri afaria: Errusiar entsalada, bakailaoz betetako piperrak, oilaskoa saltsan, arroz esnea, edaria eta ogia. Ondoren Bingo musikala.
00:00: DJ Bullen emanaldia.
Goizaldean, edabe magikoa banatuko diete parrandan jarraitzen dutenei.

Hilak 18, igandea:

12:00: Toka eta Bote txapelketa.
14:00: Auzoko gazte izandakoen bazkaria.
17:00: Apar festa eta uraren jaia. Bainujantzia eta ura botatzeko egokia den edozein tramankulu eramateko eskatu dute.
18:00: Carlos Javier & Latin Dziadeken kontzertua lokal berrian.
18:30: Gaztañotik Mundura. Beste tokietako musika, dantza, janari eta edariak.

Hilak 23, ostirala:

17:00: Haurrentzat herri kirolak Arramendiko zelaian. Arratsaldean, sardinak, txorizoa, saiheskia eta sagardoa txosnan.
Iluntzean ikuskizuna eta ondoren, sua piztea. Bideo emanaldia eta zezen suzkoa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.