Zaria Koru Eskola osatzen duten abesbatza ezberdinek hartuko dute parte Zaria USAn Uso ikuskizunean, Zaria, Zariagaz, Zariatxo, eta Zaria txiki, baita luxuzko gonbidatuak ere.
Lehenengo saria eskuratuta itzuli ziren Zariagaz Abesbatzako kideak Asturiasetik otsailean. Argazkia: Zaria Koru Eskola
Ikuskizun errepikaezina. Hala definitu du
Zaria Koru Eskolako zuzendari Imanol Elizasuk larunbatean Fatimako Andra Mariaren elizan egingo duten ikuskizuna. Zaria Koru Eskola osatzen duten abesbatza ezberdinek hartuko dute parte
Zaria USAn Uso ikuskizunean, Zaria, Zariagaz, Zariatxo, eta Zaria txiki, baina beraiekin batera izango dituzte Haatik Dantza Konpainia, Oscar Portugues flamenko gitarrista eta taldea, Iñaki Alberdi akordeoi jotzailea, Patxi Zubizarreta idazlea, eta Anne Bengoa, Maider Ronquete, Hodei Gabino, Thayan Elim, Jose Altamira eta Cristian Goex abeslariak, besteak beste.
Emanaldiak helburu zehatza du. Udaran Zaria Koru Eskolako talderik helduena Ameriketako Estatu Batuetara doa, zehazki Renotik hurbil dagoen Gardnervilleko (Nevada) euskal etxean ospatuko duten Kantari Egunean pate hartzera. “Gonbidatu gaituzte bertara joatera, eta hausnarketa eginda, aurrera egin dugu, eta bagoaz”, azaldu du Elizasuk. Bidiak erronka suposatzen du, baita ekonomikoa ere, eta bidaia ordaindu ahal izateko hainbat emanaldi egin dituzte. Larunbatekoa horietako bat da, “Kurtso amaierako kontzertua izango da, aina berezia, eta horretarako lehen mailako artistak izango dira gurekin”.
Abuztuaren 12an izango da Kantari Eguna, baina 5etik 15era izango dira Zariako kideak bertan, eta egun horretako emanaldiaz gain, beste hiru kontzertu ere emango dituzte Gardnervillen, “erakutsi nahi dugulako Zaria Koru Eskola zer den”.
Bi ordu ingurukoa izango da Zariak larunbatean emango duen ikuskizuna, 20:15ean hasita, eta agertokian gauza ezberdinak eskainiko dituztela esan du Elizasuk, “esparru oso diferenteetatik datoz parte hartuko duten gonbidatuek, eta ikusiko duguna, azken batean, izugarrizko kalitatezko emanaldia eta oso estilo ezberdinetakoa. Luxua izango da, eta ilusio izugarriarekin ari gara”. Emanaldiaren haria, Patxi Zubizarretak josiko du. Atzean lan izugarria dagoela esan du, baina aitortu du gustura eta borondatearekin egindako gauzak erraz bihurtzen direla.
Bi urteko ibilbidea
Bigarren ikasturtea amaitzear da Zaria Koru Eskola eta dagoeneko hamaika emanaldi egin dituzte eskolako abesbatza ezberdinek. Larunbateko kontzertua amaituta, Zariatxo eta Zariagaz abesbatzekin Persanera (Paris, Frantzia) joango da Elizasu europako gazte abesbatzen jaialdian parte hartzera. Zariagaz abesbatzak, berriz, pasa den otsailean saria irabazi zuen Asturiasen egindako abesbatzen txapelketan, eta Zariatxo Alemanian izan zela emanaldia eskaintzen nabarmendu du Elizasuk. Horiekin batera Errenteria-Oreretan emanaldiak egiten dituzte Zaria eskolako abesbatzek, eta ikastetxeekin urtero Abesbatza Eskola proiektua.
2018-2019 ikasturterako agenda betetzen hasia du jada Zariak, Gipuzkoako lehen koru eskolak. Une honetan 7 urtetik gorako 130 abeslari ari dira Elizasurekin koru eskolan bost taldeetan banatuta. Kopurua garrantzitsua dela dio Elizasuk, baina kalitate musikala eta batez ere humanoa nabarmendu du. Datorren ikasturterako matrikula epea zabalik du Zaria Koru Eskolak, izena emateko interesdunek Zariaren
posta elektronikora mezua bidali edo 635 20 09 62 telefono zenbakira deitu dezakete.
Datorren ikasturterako ekitaldiak ugaritzen ari bazaizkio ere, datorren larunbatari begira da Zaria Koru Eskola, bertako abeslariak, baita Elizasu bera ere: “Ikuskizun polita eta borobila izango da eta herritar guztiak animatu nahi ditut parte hartzera”. Sarrerak salgai daude dagoeneko Zaria Koru Eskolaren egoitzan (Segundo Izpizua kalea 3), 10 euroan helduentzat eta 5 euroan haurrentzat.
Zaria Koru Eskolaren emanaldiak urte amaiera arte
- Hilak 17, larunbata, Zaria Koru Eskolako kurtso bukaera emanaldia Errenteriako Fatimako elizan 20:00tan. Zaria AEB 2017 laguntza kontzertua, sorpresaz betea: Zaria, Zariagaz, Zariatxo, Zaria txiki, Haatik Dantza Konpainia, Oscar Portugués, Patxi Zubizarreta, Iñaki Alberdi, Hodei Gabino, Maider Ronquete…
- Hilak 22-27: Zariatxo eta Zariagaz abesbatzak Persaneko (Frantzia) abesbatza gazteen jaialdian izango dira.
- Hilak 20, osteguna: Zaria eta Zariagaz Errenteriako Madalena festa pregoi kontzertuan parte hartuko dute. Errenteriako Zumardian 20:00etan.
- Abuztuak 5-15: Zaria abesbatzaren AEB Ameriketako Estatu Batuetako bira.
- Irailak 30 larunbata: Zaria eta Zariagaz Dax-eko (Frantzia) musika jaialdian, Daxeko katedralean 20:30tan.
- Azaroak 18 larunbata: Zaria Koru Eskolaren Santa Zezilia kontzertua 20:00tan.
- Abenduak 22 ostirala: Zaria Koru Eskolaren Gabon kontzertua 20:00tan.
