Hitzaldia eta erakusketa antolatu ditu Errenteria Irabazizek bi urteko agintaldiaren gaineko hausnarketa egiteko.
Errenteria Irabaziz alderdiak gaur egindako agerraldia.
Bi urte direla aldaketarako hautagai zerrendak udaletara heldu zirela-eta, agerraldia egin du gaur Errenteria Irabazizek: “Agintaldiaren erdira helduta, hausnarketa egiteko unea iritsi da, zein aldaketa egin diren aztertu, zein zailtasun topatu ditugun, eta egiteko duguna ere mahai gainean jartzeko”. Horretarako erakusketa eta hitzaldia antolatu dituztela esan du Nagore Basurtok. Hitzaldia ostiralean izango da Xenpelar Etxean 19:00etan. Hitzaldi horretan, Edurne Egino (Izquierda-Ezkerra) Gizarte Zerbitzuetako Iruñeako Udaleko zinegotziak, Pablo Hijarrek (Zaragoza en Comun) Etxebizitza eta Kirol zinegotzia Zaragozako Udalean, Yolanda Diazek (Mareako diputatua), Jon Collarrek (Errenteria Irabaziz) Kultura zinegotziak eta Julen Mendoza (EH Bildu) Errenteriako alkateak hartuko dute parte.
” Hitzaldian bi urte hauetan izandako lorpenak; aldaketa espektatibak; EAJk, PSE-EEk eta PPk gobernatzen dituzten udalekin dauden aldeak; mugimendu sozialen eragina, eta egiteko ditugun lanak jarriko ditugu mahai gainean”, esan du Basurtok.
Erakusketa berriz bihar bertan egingo dute udaletxeko arkupeetan 18:00etan hasita. Bertan Bi urteetako ibilbidea erakutsiko du Errenteria Irabazizek argazki, agiri, eta prentsan argitaratutako albisteak bilduko dituzte.
Jose Cruz Legorburuk Errenteria Irabazizena proiektu “zintzo eta inklusiboa” dela esan du, eta duela bi urte udalera iritsi zirenean herritarren bizimodua hobetzea zutela helburu, “duintasunak berreskuratzea”. Gogora ekarri du 2015eko Udal Hauteskundeetan 3.518 errenteriarren babesa jaso zutela, “eta bereziki haien konfiantza herri hobeago bat egiteko”. Bi urteko agintaldian, EH Bildurekin batera Gobernu taldean da Errenteria Irabaziz, udala gardenagoa, hurbilagoa eta erabilgarriagoa egiteko lanean aritu direla erantsi du, “lan handiarekin, umiltasunarekin eta konstantziarekin. Errenteriako Udala egunetik egunera administrazio eredu arinagoa, eraginkorragoa eta herritarrengandik hurbilagoa egiten ari gara”. Pertsonak oinarri direla alderdiarentzat ere esan du, eta horren harira, gizarte zerbitzuetan oinarrizko prestazioak behar dituzten guztiengana heltzea duela helburu alderdiak esan du Legorburuk. Horrekin batera, hondakinen sorrera gutxitzen duen Ingurumen politika, kontsumo energetiko iraunkorra, eta kultura erreferentzia egitearen alde lan egiten dutela, “eredu sozio ekonomiko berri baten alde.
Bi urteko agintaldia dagoela aurretik esan du amaitzeko Legorburuk: “Gure apustua udala herritarren eta herriaren zerbitzua jartzen jarraitzea da, eta eraikitzea geureagoa den Errenteria bat”.
