Herrian agertutako pintadak gaitzetsi ditu udalak

Pintadak azaldu dira gaur Lezoko kaleetan, eta udalak "irmoki gaitzetsi" ditu: "Ez da lehen aldia herrian pintaketak egiten dituztela eta horien garbiketa kostua, gainera, guztion poltsikotik ordaindu beharko dugu". Horren harira, errespetua eskatu du, "errespetua eremu publikoekiko, eta errespetua gainerako herritarrekiko".

Ikerne Zarate Gartziarena

Lezo

2017/06/23

Lezon azaldu diren pintadak gaitzetsi ditu udalak. Argazkia: Lezoko Udala

Pintadak azaldu dira gaur Lezoko kaleetan, eta udalak “irmoki gaitzetsi” ditu: “Ez da lehen aldia herrian pintaketak egiten dituztela eta horien garbiketa kostua, gainera, guztion poltsikotik ordaindu beharko dugu”. Horren harira, errespetua eskatu du, “errespetua eremu publikoekiko, eta errespetua gainerako herritarrekiko”. Pintadak garbitzea 3.321,87 euroko kostua izango duela gaineratu du, eta hausnarketa egiteko eskatu die pintaden egileei, “errespetuak elkarbizitzarako oinarrizko elementu eta baldintza izan behar duelako”. Garai berriek jarrera berriak eskatzen dituztela nabarmendu du bestalde, “beharrezkoa da horrelako ekintzak eta jokabideak atzean uztea elkarbizitzaren aldeko urratsak egiteko”. Azalduko pintadek, atzo alkatearen aginduz eraitsi zuten Goiko plazako kioskoaren gainekoak dira, eta horren harira, kioskoa “segurtasun neurriengatik” eraitsi dutela azaldu du udalak: “Hainbat gaztek kioskoa berritzea erabaki zuten, udalean eskaerarik egin gabe. Horren aurrean, eta kioskoa ez zegoela egoera onean jakinik, , udal arkitektoak kioskoari buruzko txosten teknikoa egin zuen bertan egokitzapen lanetan ari ziren gazteentzat arriskutsua izan zitekeelako”. Txostenak dionaren arabera, eraikina ez zegoen egoera onean eta ez zen segurua, “horregatik herritarren, eta batez ere gazte horien segurtasuna bermatzeko kioskora inor ez sartzeko agindua eman zuen udalak” Zer edo zer gertatzekotan erantzukizuna udalarena litzatekeela esan du azkenik, “eta guztiaren gainetik, udalaren ardura eta betebehar nagusia da herritarren segurtasuna bermatzea”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.