Lau amona iraultzaile probokatzera datoz
Lau atso iraultzailek metodo zentzugabeen eta protesta erabat desegokien bitartez mundua iratzarriko duen mugimendua ekarriko dute Errenteria-Oreretara uztailaren 8an.
Lau atso sumindu eta iraultzaile gizartearen desilusio, atsekabe eta nahigabeaz ohartu eta euren esku hartu dute iraultza, komunikabideetan zein kalean ikusi eta entzuten duten guztia oinarri hartuta. Oldarkortasunezko metodo zentzugabeen eta protesta erabat desegokien bitartez mundua iratzarriko duen mugimendua ekarriko dute Errenteria-Oreretara.
‘Femmes’ izeneko antzezlana izango da ikusgai uztailaren 8an Alamedan 19:30etik aurrera. Hortzmuga Teatroko lau aktore lau amonatan murgilduko dira. Testurik gabe eta testuingurura moldatuz ekingo diote lanari, “espazio publikoa hartu eta ikusleengan zuzenean eragiteko asmoz”. Taldeak dioenez, neoaktibista sozial bilakatu diren atso batzuen aldarrikapen-kantua da FEMMES, aldarrikapen politikoki ezegokia egiten duena; borroka tresna bilakatu baitute probokazioa.
