Txirigoten garraztasuna, kalera

Txirigotak izango dira asteburuan Errenteria-Oreretako kaleetan. Sevillatik etorriko dira bi, Cadizeko inauterietan parte hartzen dutenak.

Urko Etxebeste Petrirena

Errenteria-Orereta

2017/06/29

Atxukarro, Gomez eta Collar, gaurko aurkezpenean.

Txantxaz betetako bi egun dituzte aurretik errenteriarrek asteburuan. Cadizeko inauteria, txirigotak, herrian izango dira. Tira, berez, herrira larunbatean eta igandean etorriko diren bi txirigotak Sevillakoak dira, baina Cadizeko inauterietako txirigoten lehian parte hartzen dute. Hori bakarrik ez; kalean Andaluziako hirian egiten dituzten ikuskizunetan, jarraitzailerik gehien dutenak dira, Cadizeko biztanleen inbidiarako. Beti Prest Dantza Taldearen ekimenez, eta laugarrenez, Cadizeko inauteria herrian izango da. Larunbatean, lehenengoz, 12:00etatik aurrera kalean jardungo dute —Xabier Olaskoaga plaza, Madalena kalea eta Zumardia artean— bi txirigotek, eta igandean, 12:00etan, baina Niessen kulturgunean (sarrerak 18 euro), emango dute ikuskizuna. Chririgota del Bizcocho taldeak No te vayas todavía ikuskizuna eskainiko du, eta Chirigota de Sevilla 2017k, berriz, Esta chirogota cae bien. Beti Presteko kideek gaurko aurkezpenean esan dutenez —Karmele Gomez eta Josean Atxukarro egon dira gaurko agerraldian—, satiraz, ironiaz eta txantxaz beteriko bi talde horien ikuskizunak ezin dira galdu, “egungo gaiak, gizartekoak, lantzen dituzte, euren ironiarekin. Ikuskizun ederrak dira, betiere pasodoble eta cuple doinuekin”. Zehazki, Cadizeko txirigoten lehiaketan hirugarren saria lortu zuen Chirigota del Bizcochok. Nabarmendu dutenez, gainera, txirigota horretan emakume bat dago, “hori ez da ohikoa talde horietan. Hurrengo urterako gure helburua da emakumeen talde bat ekartzea”. Ion Collar Kultura zinegotziak nabarmendu herrian erreferentzia bihurtu dela txirigoten topagunea. Eta Beti Prest-ek lan handia egin duela aurten, laugarrenez, jaialdia herrira etor dadin. Aldi berean, Errenteria-Cadiz arteko zubiaz hitz egin du, “kulturen arteko zubia da, 1.200 kilometrok urruntzen gaituzte, baina esaten dutena, herrian esango dutena, denok ulertuko dugu”. Zubiaz hizketan, Collarrek adierazi du Kukai Dantza Cadizen izandakoa dela aurten. Ikuskizunak larunbatean eta igandean izango diren arren,. ostiralean ongi etorria egingo diete bi taldeei, txistulari, koru eta guzti. Horren prestaketan buru-belarri ibili da Beti Prest.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.