Aitzol Gogorza askatzeko sortu diren mugimendu guztien baturaren sinbolo izateko asmoa du bihar egingo duten mosaikoak. Bertan erabiliko diren kartulinak herrian jartzeko eskaera egin du Sarek.
100.2 artikulua aplikatzeko eskatuz, aurretik egindako agerraldia.
Aitzol Gogorza larri gaixo dagoen presoaren etxeratzea eskatzeko mosaiko erraldoia egingo dute bihar, 18:00etan hasita. Hasiera batean Zumardian zen egitekoa ekitaldia, baina eguraldi eskasa iragarrita dagoelako, Koldo Mitxelena ikastetxeko gune estalira lekualdatu dute ekintza. Oreretako Sarek deitu ditu herritarrak mosaikoa osatzera.
Mezu garbia helaraziko dute biharko agerraldian: Gogorzari espetxe araudiko 100.2 artikulua aplika diezaiotela. Hau da, gaixotasun larri eta sendaezinak dituzte presoek kondena euren etxean bete dezatela zabaltzea. Mezuaz gain, aniztasuna irudikatuko dute mosaikoarekin. Izan ere, azken urteetan askotarikoak izan dira Gogorzaren askatasuna eskatzeko egin direnak, eta horiek denak batzeko, sentsibilitate ezberdinak bideratzeko aukera baliatu nahi dute Sareko kideek.
Izan ere, 100.2 artikuluaren aplikazioa eskatzeko mugimenduari askotariko talde, elkarte eta eragileak batu zaizkio: Errenteria-Oreretako zinegotzi eta zinegotzi ohiak —ia alderdi guztietakoak—, gehiengo sindikala, elizarekin harremana duten taldeak, Orereta Ikastolako langileak, tabernariak, eskubaloi jokalariak… «Aitzol etxera! 100.2 artikulua orain ideiarekin bat egin dutenak asko izan dira. Mezu horrekin eroso sentitu dira herriko alderdi, talde edo eragile gehienak. Orain, hori herrira are gehiago zabaltzeko garaia da», esan dute Sareko kideek.
Horregatik, biharko mosaikoan parte hartuko duten herritar guztiek, kartulina etxera eramateko aukera izango dute, helburu jakin batekin.
Mezua zabaldu
Mosaikoa egiteko kartulinen bidea ez da bihar bukatuko. Saretik deialdia egin dute: «Nahi duguna da, mosaikoaren ondoren, norberak bere etxera eramatea kartulinak. Ondoren, bakoitzak hobekien ikusten duen tokian jar dezala bere zatia, lantegian, kiroldegian, bere auzoko txokoren batean… Dinamikak iraunkorra izan behar du, Aitzol etxeratu artekoa. Horretan eragin nahi dugu: 100.2 artikulua ezartzearen alde adostasun zabala lortu da herrian, eta hori, ekintza puntualetatik, egunerokora eramatea da asmoa».
Apirilaren 8an, ETAren armagabetzea egin zen Baionan, gizarte zibilaren inplikazio zuzenarekin. Filosofia horri eutsi behar zaiola adierazi du Sarek, «gizarte zibilaren ekimenak ekarriko du Aitzol etxera, hortaz ziur gaude».
