Madalenak ospatuko dira Oreretan uztailaren 21etik 25era. Hainbat xehetasun eman ditu gaur Jai Batzordeak.
Errenteria-Oreretako Jai Batzordea madalenetako xehetasunekin
Hilabete eskas jaietarako, prest azaldu da Errenteria-Oreretako Jai Batzordea. Azken ukituak emateko bilerara joan aurretik argazkia atera dute eta hainbat ekintzen berri eman.
Uztailaren 21etik 25era ospatuko dira Madalenak Errenteria-Oreretan. Hilabete hauetan botatako ideia guztiak batu eta programa osatzea lortu dute. Guztia auzolanean eta ilusioz egin dutela azaldu dute.
165 ekintza baino gehiago. Tartean, erakusketak, dantza, antzerkia, danborradak, lehiaketak, dastaketa gastronomikoak, kirol jarduerak eta kontzertuak egongo dira. Kontzertuen kartela aurretik iragarrita zuten arren,
20 kontzertu baino gehiago egongo direla gogorarazi dute, estilo eta publiko desberdinentzat: Ken Zazpi, Willis Drumond, La Basu, Roba Estesa, Mojinos Escocidos, Ruper Ordorika…
Berritasunak
Aurten txupinazoa bizitzeko aukera desberdinak proposatu dituzte. Mila koloreko txupinazo txikia egongo da 17:30ean Koldo Mitxelena plazan. Pixka bat beranduago, 18:30ean
Holi festa hasiko da Gernika plazan. Betiko txupinazoa ere mantenduko da, baina gehigarri batekin: Zumardian pantaila erraldoi baten bitartez ikusi ahal izango da zuzenean udaletxeko plazan gertatzen ari ena, baita
Herri Bizia webgunean ere.
Txupinazioa aurretik hasiko dute festa, ordea, uztailaren 21ean bazkari herrikoia antolatu baitute. Hiru menu izango ditu: beganoa, helduena eta haurrena. Herritar oro gonbidatu nahi dute ekimen honetara. Horretarako tiketak uztailaren 7 arte eskuragarri daudela gogorarazi dute. Menu beganoaren tiketak Sindikato tabernan daude. Helduen menuarenak Reyna, Xera Gastroteka eta Aralar tabernan. Eta haurrenak Xenpelar Kulturdendan.
Herritik herriarentzat
“Jaiak herritik eta herriarentzat” direla azpimarratuta gozamena jarri dute oinarrizko lege: “Prestatzen gozatu dugun adina gozatuko dugu festak biziz eta herritarrek hala bizi ditzaten espero dugu: jaiak marraztuz, parte hartuz eta jai herrikoiak biziz”. Honekin batera, mezu eta deialdi bat zabaldu dute: “Jai berdinzaleagoak eraikitzen hasteko
hausnarketara gonbidatu nahi zaituztegu herritar guztioi. Horretarako, animatu uztailaren 5ean 18:00etan merkatuzarrean egingo den lehen hausnarketa kolektibora”.
