Bi lidergo Koxtaperentzat

Batelerek bosgarren bandera irabazi dute jarraian, eta KAE 2ko mutilek lidergoan kokatu dira atzo Elantxoben irabazita.

olatz mitxelena

2017/07/03

KAE 2 Ligan liderrak dira San Juango mutilak.

Bitik bi irabazi dituzte asteburuan Batelerek, biak Donostian, eta honenbestez bosgarren bandera irabazia dute jarraian. Lider argiak dira San Juango emakumeak, orain arteko estropada denak irabazita. Sailkapenean, bigarren dago Hibaika, puntu bateko aldearekin, eta hirugarren Orio, bi puntura. Bigarren lidergoa, KAE 2 ligan du San Juanek. Ondo ari dira Errekako mutilak. Larunbatean, bigarren izan ziren Zumaian, eta atzo, berriz, lehenak Elantxoben. Honenbestez, lidergoan kokatu dira arrosak, Lapurdiren aurretik. Hirugarren tokian dira Hibaikako mutilak, fin baita ere denboraldiaren hasieratik, eta 11. postuan dira sanpedrotarrak. Eusko Label Ligan, Urdaibai aurretik Asteburuan hasi den Eusko Label Ligan Joseba Fernandezek entrenatzen duen trainerua jarri da lider. Larunbatean lehen estropada irabazi zuen Urdaibaik, baina atzo, Oriok aurre egin zien. Lehen asteburua igarota, hiru faboritoak dira sailkapenaren buruan, ondorengo hurrenkeran: Urdaibai, Orio eta Hondarribia. Eskualdeko traineruei erreparatuta, bestalde, San Juan eta San Pedro hobeto moldatu ziren larunbatean atzo baino. San Juan seigarrena izan zen Bilbon, eta atzo, berriz, zortzigarren Portugaleten. Seigarrenak dira arrosak sailkapenean. San Pedro bederatzigarren iritsi zen atzo, eta zortzigarren izan zen Bilbon. Sailkapeneko hamargarren postuan daude sanpedrotarrak, bederatzi punturekin, Cabo, Ares eta Ondarroarekin berdinduta. Estu daude jada gauzak sailkapenaren behealdetik. Seigarrenetik 11.era hiru puntuko aldea baino ez dago jada.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.