EH Bilduren ustez Lezoko Udala "noraezean" da

Legealdiaren erdian, balantzea egin du koalizio abertzaleak, eta aldizkari baten bidez lezoar guztiei helarazi die.

olatz mitxelena

2017/07/06

Ainhoa Intxaurrandieta eta Mikel Arruti, Lezoko EH Bilduko kideak.

“Noraez eta gorabehera handiko bi urte” izan dira legealdiko azken biak, Lezoko EH Bilduren iritziz, eta EAJ-PSE-EEri “gutxi batzuen interesen arabera, arduragabekeriaz eta gezurrez betetako legealdia” aurrera ematea leporatu die. Salatu dutenez, “gai nagusietan erabakiak Lezotik kanpo hartu dira” eta “lezoar guztien diru publikoa gutxi batzuei mesede egiteko” erabiltzen ari direla salatu dute. EAJ “udal kontratu handienak garestitzen” ari dela salatu dute, “aurrezkiak xahutzen, eta udalaren etorkizuna baldintzatzen” ari dela deritzote, eta guztia “lezoarrei eta hauen beharrei bizkar emanda” egin izana deitoratu dute. Adibide batzuk ere aipatu dituzte, hondakinen bilketa eta kale garbiketa zerbitzua kasu. Zerbitzua garestitu ez ezik, bilketaren kudeaketa eta kontrola mankomunitatearen esku utziko dutela salatu dute, “herritarrei galdeketa egitea guztiz baztertuz”. “Inprobisazioa, informazio falta eta gardentasun eza gobernuaren jardueraren ezaugarri nagusiak ditugu”, adierazi du koalizio abertzaleak, eta erabakiak ezohiko plenoetan hartzen dituztela salatzeaz gain, herritar eta elkarteekin elkarlanerako diren batzordeetara ez direla joaten salatu dute. Gobernuak euskararekiko duen jarrera ere salagarria da EH Bilduren ustez: “Gobernu bilerak gaztelera hutsean izaten dira, udalak egindako ia txosten guztiak gazteleraz egiten dituzte”. Horrez gain, txostenak euskaraz eskatzen dituztenean, zailtasunak dituztela eta beti berandu jasotzen dituztelako kexatu dira. Bestalde, “herri mugimenduaren lana zikintzeko asmoz”, azkenaldian gezurretan aritu izana leporatu diote gobernu taldeari, san joan bezperan ezezagunek Zubitxo errekara bota zuten edukiontziaren harira gertatu zirenak gogora ekarriz. Baina balantzea ezkorra izanda ere, adostasunetara iristeko prestutasuna agertu du EH Bilduk, eta Kepa Garbizu alkate zela zabaldutako bideari eusteko eskatu dute. ” Lezoren etorkizuna inoren eskutan utzi gabe, herriko gaiak lezoarrekin landu eta erabaki behar ditugula uste dugu”, esan dute, eta “aurrerantzean elkarlanerako bide gehiago” zabalduko dituztela iragarri dute. Bien bitartean, herritarren iritzi, ekarpen edo bestelakoak posta elektroniko bidez bidaltzeko eskatu diete.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.