Hiri paisaiak izeneko erakusketa abiatu dute, 1982tik hona Errenteriak izan dituen aldaketak ezagutarazteko.
Hiri Paisaiak erakusketa Xenpelar Etxean ikusgai
Izenburu hori jarri diote Xenpelarren, atzo, hilak 6, inauguratu zuten argazki erakusketari. Madalenen bueltan ohikoa den erakusketak hiria bera hartu du hizpide aurten. Duela 30 urte zena eta gaur dena konparatuz, historia bera erakusten dituzte argazkiek.
Udaleko postara modu anonimoan argazki zaharrak iritsi zitzaizkiela kontatu du Garazi Lopez de Etxezarreta zinegotziak eta aprobetxatu egin behar zirela gaineratu du. Irudi horiek, 1980ko hamarkadako Errenteriakoak dira, gehienbat. Herrian gaur arte egon diren hirigintza aldaketak ikusteko balio izan die. Hala nola, orduko eta oraingo argazkiak konparatzen dituzte erakusketan, leku bera bi modu desberdinetan erakutsiz: topoaren Galtzarabordako geltokia, Kaputxinoetako parke-behatokia, Gabierrotako Nafarroa parkea, Oiartzun ibaia, Paisa, Lino eta Mantas fabrikak eta haien eraispena, Iztieta pasealekua…
“Memorian ez dauden paisaiak” ezagutaraztea da helburua, hala diote Lopez de Etxezarreta eta Ion Collar zinegotziek. Haiek aurkeztu zuten atzo erakusketa: “Gutxi dirudien arren, 30 urtean gauza asko aldatzen dira, argazki horiek historia erakusten dute”. Errenteria nolakoa zen eta den erakusten du, baita “industrializazioak utzitako hutsuneak nola joan diren betetzen”.
Ildo beretik, herritar oro animatu nahi dute dituen argazkiak bertara eramateko. Ordenagailua bertan daukate edozein unetan eraman nahi izanez gero. Bertaratzen denak argazki guztien kopia eskura duela ere gaineratu dute: “Guztion artean berreskura dezagun herria”. Hilaren 29ra arte egongo da ikusgai Xenpelar Etxean, astelehenetik larunbatera, 17:00etatik 20:00etara.
Unea bizi zutenekin hitzaldiak
Argazki erakusketaz gain, bi hitzaldi antolatu dituzte garai haietan herriak izan zuen aldaketa urbanistikoa hobe ulertzeko, baita gizarte mugimenduek sortutako alternatibak ezagutzeko. Lehen pertsonan bizi zuten bi lagunekin kontatzen dute horretarako: Enrique Ponte Ordoqui udal arkitekto ohia eta hiri Antolamendurako Plan Orokorraren zuzendaria, eta Angel Martin Ramos Kataluniako Unibertsitate Politeknikoko katedraduna eta auzo elkarteen Hirigintza Koordinakundeak eskatuta hirigintza-txostenaren egileetako bat.
Lehenak, hilaren 13an emango du hitzaldia:
Un breve recorrido por su historia urbana. Eta bigarrenak, hilaren 14an:
Transicion y cambio urbano en Errenteria. Biak 19:00etan Xenpelar Etxean bertan. Moderatzaile lelanetan Calia Lana arkitektoa arituko da.
