"Bidegabea da jasaten ari diren zigorra"

Orain arte herritarrek erakutsitako babesa "bihotzez"eskertu, eta "beharrezkoa" dutela nabarmendu zuten, eta eskaera egin zieten erakunde eta politikoei: "Desproportzioaren kontra eta arrazoiaren alde egin dezatela, kasu honetan eta bestetan, dagoeneko batzuk egin duten bezala".

Ikerne Zarate Gartziarena

Errenteria-Orereta

2017/07/12

Ehunka lagun bildu ziren elkarretaratzera lau gazte oreretarrei elkartasuna adierazteko.

Lau hilabete bete ziren atzo Iruñean lau gazte oreretarrak atxilotu zituztela, eta beste hainbeste denbora beteko dute bihar horietatik hiruk espetxean. Elkarretaratzea egin zuten atzo Etorkizunaren Alde eta Oreretako 4ak Askatu plataformek deituta, bi aldarri nagusirekin: martxoaren 11n Iruñean gertatutakoak terrorismotzat ez jotzea, eta hiru gazteak berehala askatzea. Ehunka lagun bildu ziren eskaera horien bueltan atzo arratsaldean Herriko Plazan egindako elkarretaratzera. Auzia Espainiako Auzitegi Nagusiaren esku da ekainetik, nahiz eta apirilean Nafarroako Probintzia Auzitegiak ebatzi zuen auzitegi arruntean epaitzea, haren ustez, gertaerak ezin direlako terrorismo gisa kalifikatu. Bi plataformek salatu dutenez, Espainiako Auzitegi Nazionalak instrukzioa bere esku hartu duenetik, lehen erabakia hiru gazteen behin-behineko espetxealdia berrestea izan da: “Bidegabea da, justifikaziorik gabekoa Asier, Endika eta Ruben jasaten ari diren zigorra. Ez da aintzat hartu gazteen errugabetasun presuntzioa, eta proportziorik gabeko neurria da kartzelan edukitzea, haien ikasketak, lana eta bizitza guztiz etenda”. Argi esan zuten, “ez ditugu bakarrik utziko”. Orain arte herritarrek erakutsitako babesa “bihotzez” eskertu, eta “beharrezkoa” dutela nabarmendu zuten, eta eskaera egin zieten erakunde eta politikoei: “Desproportzioaren kontra eta arrazoiaren alde egin dezatela, kasu honetan eta bestetan, dagoeneko batzuk egin duten bezala”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.