Karmenak hasiko dira gaur, eta igandera arte jaietan murgilduko dira trintxerpetarrak.
Festetan egunero daude danborradak Trintxerpen.
Antxotik Trintxerpera jauzi egin du festen lekukoak Pasaian. Gaur hasiko dira karmenak, arratsaldean, eta igandera bitartean hamaika ekitaldi izango dira Euskadi etorbidearen bueltan.
Berritasunen artean aipatzekoak, gaurko Haurren Txupinazoa (18:30ean Gudarien Enparantzan), eta buruhandien konpartsan pertsonaia berria, Zigor Gartziak sortutako marinela, arrantzale beldurgarria.
Ezin zen besterik izan. Arrantzale giroko festak dira karmenak, itsasoaren tradizioari estu lotutakoak. Karmengo Amaren omenez ospatzen dira jaiak, eta arrantzaleen zaindariari gorazarre egiteko egunak izaten dira Trintxerpen, igandeko marinelen danborrada horren erakusgarri. Arrantzaleak irten ohi dira danborradan, ama birjina lagun, eta harekin prozesioan itsasoratzen dira.
Baina dena ez da tradizioa. Gazteen ekarpena nabaria da, Korkoiburuen Taldeak gogotsu bultzatuta. Herri bazkariak, kontzertuak, erromeriak, kirol ekitaldiak, musika, dantza, antzerkia… hamaika aukera festa gogoa den edonorentzat.
Aparkalekua
Festak bitartean ez da erraza aparkatzea Trintxerpen, eta komeni da garraio publikoan joatea. Edonola ere, Lasako aparkalekua barrakekin okupatua dagoenez, beste hiru eremu egokitu dituzte:
-
Rodolfoko aparkalekua: Gaurtik astelehenera arte (06:00etarako libre behar du astelehenean).
-
Gudari plazaren pareko aparkalekua, barrera duena: bihar (hilak 14, ostirala) 12:00etan irekiko dute, eta igandean itxiko dute, 18:00etan.
-
Portutik ateratzeko bide nagusian, Aduana kalean: baterian aparkatu ahal izango da bihar 21:00etatik igandeko 00:00etara.
Egitaraua
