Sailkapen orokorrean bigarrenak dira, Urdaibairen atzetik; Bandera kopuru bera dute biek.
![Hondarribia](http://oarsoaldea.hitza.eus/site/files/2017/07/Hondarribia.jpg)
Hondarribia bigarren postuan da EuskoLabel Ligan, Urdaibairen atzetik (arg: @ArraunakGora)
Urdaibairi sei segundoko abantaila aterata Hondarribiak irabazi zuen atzo Adegi Bandera Pasaian. Liderrak dira bizkaitarrak
EuskoLabel Ligan. Hondarribiak bezala bi bandera irabazi ditu Urdaibaik denboraldia hasiz geroztik. Biak daude sailkapenaren buruan, hurrenez hurren.
Hirugarren postua Zierbenarentzat izan zen Pasaian, eta laugarrena Oriorentzat. Sailkapen orokorrean, ordea, hirugarrenak dira Jon Salsamendiren mutilak. Beraiek irabazi dituzte bandera gehien, hirugarrena eta azkena, larunbatean Santanderren, Urdaibai eta Hondarribiaren aurretik, hurrenez hurren.
Sailkapenaren erdialderago, traineru pasaitarren arteko lehia estua izan zen badian. San Pedro zortzigarren postuan helmugaratu zen eta bederatzigarrenean San Juan, eta bien artean bi segundoko alde baino ez. Sailkapenean orokorrean, ordea, arrosak daude aurretik. 43 punturekin zazpigarrenak dira. San Pedrok, berriz, 38 puntu ditu eta hamargarrena da.
KAE2 Ligan, Lapurdi buruan
KAE2 Ligako bi estropada jokatu dituzte asteburuan, larunbatekoa Hibaikak antolatuta, Pasaian jokatu zen, eta atzokoa, Mutrikun, biak ere madalenetako jai egitarauen barruan. Bietan, sailkapenaren buruan, oso antzeko joan ziren gauzak.
Asteburuko bi estropadak Lapurdik irabazi ditu eta Hibaika eta San Juan izan dira bigarren eta hirugarren hurrenez hurren.
Sailkapen orokorrean ere hurrenkera berean daude sailkatuta, lehenbiziko hiru postutan.
Bihar, Euskadiko Txapelketa
Hurrengo zita bihar bertan dute traineruek, Lekeition, 12:00etatik aurrera jokatuko dute Euskadiko Txapelketan. Partaideak, gizonetan, ondokoak dira: Ondarroa, Pasai Donibane Koxtape, Zierbana, Kaiarriba, Bermeo, Hondarribia Kaiku eta Orio. Emakumetan, berriz, Kaiarriba, Donostia Arraun Lagunak, Hernani, Orio, Hibaika, Lea Artibai, Koxtape eta Deustu.