75. urteurrena du Urdaburuk aurten eta Comete Sarearen gaineko egitarau zabala antolatu nahi izan du hilaren 5etik 10era bitartean.
Aurreko ibilaldi batean Bidasoa ibaia zeharkatzen.
Comete Sarearen Oroimenerako XVIII Ibilaldia Euskal Herrian barrena antolatu du Urdaburu Mendizale elkarteak hilaren 9 eta 10erako. Comete Sareko ibiltariekin batera hartuko du parte ibilaldian, Bigarren Mundu Gerran iheslariek eta sare horretako partaideek jarraitzen zuten bidea eginez Ziburutik Errenteriara Bidasoa Ibaia gurutzatuta.
Ibilbidea Comete sareko partaide izandakoek, garai haietako abioi gidariek, eta Urdaburu Mendizale elkarteak elkarlalean antolatu dute. Ibiltari taldeak Ziburu eta Oiartzun arteko ibilbidea egingo du oinez, bi egunez faxismoaren aurka aritu zirenei omenaldia eskaintzeko.
Hilaren 9an, 08:00etan abiatuko dira Errenteria-Oreretako Zumarditik Ziburura. eta Urruñarantz abiatuko dira eta arratsaldez San Miguel deitutako paraje inguruan Bidasoa ibaia zeharkatuko dute. Hurrengo egunean, Bidasoatik Oiartzungo Sarobe baserrira abiatuko dira. Bazkari antolatu dute ibilbideari amaiera emateko, eta Merkatuzarren izango da. Aurretik ordea, Errenteriako Udalak harrera egingo die ibiltariei, beteranoei eta Comete ibilaldiarekin zerikusia duten gonbidatutako udal ordezkariei. Bazkaria 15:00etan hasiko da, eta hura amaituta omenaldia egingo dute.
75. urteurrena du Urdaburuk aurten eta Comete Sarearen gaineko egitarau zabala antolatu nahi izan du hilaren 5etik 10era bitartean. Erakusketa, hitzaldiak, film eta bideo emanaldiak… Datorren asteartean argazki eta dokumentu historikoen erakusketa zabalduko du Urdaburuk Merkatuzarren. II. Munduko Gerra, Comete Sarearen sorrera eta garapena, eta 2000 urtetik hona antolatutako ibilaldien argazkiak bildu dituzte. Egunero 18:00etatik 21:00etara izango da zabalik, eta azken egunean, hilaren 10ean egun guztian.
Egitaraua
- Hilaren 5etik 9ra: Argazki eta dokumentu historikoen erakusketa, 18:00etatik 21:00etara.
- Hilaren 6a, asteazkena: Azken Bidaia film emanaldia, 19:00etan; El paso film emanaldia, 20:00etan.
- Hilaren 7a, osteguna: Nazis en el Bidasoa filma (gazteleraz) 19:30ean.
- Hilaren 10a, igandea: Harrera eta Comete Sareko kideei omenaldia. 14:30ean, Errenteriako Udalaren ongietorria; 15:00etan, bazkaria Merkatuzarren; 17:00etan, omenaldia eta oroitzapen ekitaldiak; 17:30ean, musika; 18:30, ekitaldien bukaera.
