Lezo-Donibane bidegorria egiteko lanak urtea bukatu baino lehen has daitezke

Bidegorria hiru fasetan egingo lukete, eta 2017a bukatu baino lehen hasi beharrekoak hirugarren fasekoak lirateke, Lezotik hurbilen dagoen zatiarena.

Urko Etxebeste Petrirena

Lezo

2017/09/01

3. faseko lanekin hasiko lirateke lehenik, herriko kaskotik hurbilen dagoen zatitik alegia.

Lezoko Udalak esan duenez, Lezo-Donibane bidegorria egiteko lanen 3. Fasearen —Lezoko herrigunetik hurbilen dagoen zatiari dagokio fase hori— lanak urtea bukatu baino lehen has daitezke. Abuztuan jarri zuen abian lan horiek egiteko enpresa kontratatzeko lanen lizitazioa; hilaren 12ra arte dute enpresek euren proposamenak aurkezteko epea. Udalak emandako ekintza egutegiaren arabera, behin proposamenak jasota, urrian esleituko zaio puntuazio onena lortzen duen enpresari 3. fase hori egiteko ardura. Helburua da, esan bezala, 2017a bukatu aurretik bidegorria eraikitzeko lan horiei ekitea. Finantzazioaz ere argibideak eman ditu udalak. Hala, hirugarren fase horren kostuaren %85 aldundiak ordainduko du, udalak eta aldundiak apirilean sinatutako hitzarmenean agertzen denez. Hau da, aldundiak 204.500 euro jarriko ditu hirugarren fase hori egikaritzeko, eta gainontzeko %15a udalak jarriko du. Beste bi faseak egiten hasteko datarik ez dago ezarrita. Edonola ere, bere garaian aldundiak horiek ere finantzatuko zituela esan zuen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.