Emakumeak antolatu eta saretzeko ahalduntze eskola martxan

2017/2018ko Emakumeentzako Jabetza Eskola aurkeztu dute. Hamaika ekintza eta aukera emakumeen ahalduntzea emateko.

Ainhoa Mariezkurrena

2017/09/05

Aurkeztu dute 2017/2018ko emakumeentzako Jabetza Eskolako nondik norakoa

Bostgarren urtez abiatu dute emakumeentzako Jabetza Eskola Pasaian. Berdintasun mahaiak zein herriko emakume talde desberdinek eskaintza zabala egin dute aurten ere eta xehetasunak aurkeztu dituzte. Emakume taldeen autonomia indartzea, sarea sortzea eta sormenezko lana eta borroka ezagutzera ematea du helburu Jabetza Eskolak. Horretarako, emakumeei zuzendutako hainbat ikastaro, tailer, hitzaldi eta topaleku antolatu dituzte 2017/2018 ikasturterako ere. “Emakumeek gizartean eta politikan parte har dezaten eta gizarte eta kultura eremutara suma daitezen, historikoki baztertuta egon baitira”, azaltzen dute esku-orrian.

Horren oinarri hartuta honakoa da eskaintza: autoestimua eta ahalduntzea, dolua eta galerak, mindfulness, elikadura eta osasuna, osasun zainketarako gakoak, jai berdinzaleagoak nola egin, batukada feminista, bideogintza, autodefentsa feminista, emakumeen ahotsak uhinetan, jatorri desberdinen arteko emakumeen taldeak, autolaguntza taldea eta sexualitate eta genero aholkularitza zerbitzua. Zehaztutako datak, irakasle edo hizlariak, lekuak eta azalpen guztiak banaturiko esku-orrietan azaltzen dituzte.

Ekintza guztiak doakoak direla gogorarazi dute eta guztiek izango dutela haurtzaindegi zerbitzua, aurrez abisatu beharko da, ordea. Urte osoan eman daiteke izena 94300 43 20 telefonoan edo berdintasuna@pasaia.net helbidean. Informazio gehiagorako bide berdinak jarrai daitezke edo udalak dituen eraikinetara hurbildu.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.