Indar biziz joango dira igandean, "aurreko igandeko estropada errepikatzera joango gara, sentsazio onekin arraun egitera, eta ahalik eta emaitza hoberenak lortzera"
Hibaika dena ematera joango da berriro igandean, Kontxa etxera ekartzeko.
Ametsa betetzea litzateke igandean Kontxa irabaztea eta herriari sari hori eskaintzea. Urteetako lanaren uzta borobiltzea eta arraunlarientzat preziatuena den saria eskuratzea. Ametsa betetzera doa Hibaika, helburu horrekin aterako dizkio aparrak itsasoari
Madalen ontziaren tripulazioak. 2.66 segundoko errenta dute errenteriarrek eta handia ez dela dion arren, edonork alde nahiko lukeela izan esan du Eli Pescador Hibaikako arraunlariak: “Alde oso txikia dela badakigu, ez dakit nahikoa izango den, igandean ikusiko dugu. Zerotik hasi behar dugu”.
Indar biziz joango dira igandean, “aurreko igandeko estropada errepikatzera joango gara, sentsazio onekin arraun egitera, eta ahalik eta emaitza hoberenak lortzera”. Iragarpenek diotenez itsasoaren egoera ez da aurreko igandekoa izango, haizea eta itsaso mugitua espero dituzte. Argi mintzatu da Pescador: “Badakigu itsasoan ibiltzen, egia da agian itsaso txarrarekin errazagoa dela akatsak egitea, baina ez diogu beldurrik. Berdin-berdin aterako gara itsasoa dagoen moduan dagoela ere”.
Bandera hurbil izan dute, hirugarren eta bigarren postuan sailkatu izan da Errenteriako ontzia, “gogoa dugu bandera etxera ekartzeko. Ea aurten lortzen dugun. Urte askotako lanaren fruitua moduren batean ikustea, biribiltzea litzateke. Arraunlari guztiek nahi izaten dute Kontxako Bandera irabazi, polita litzateke. Arraunlarien arraun bizitza guztia baldintzatzen du iraileko puntu honetara nola iristen zaren, urteko prestaketak garrantzi handia du, baina guztiak du zerikusia “.
Arerio nagusia San Juan dutela esan du Pescadorrek, “ahaztu gabe Orio hor dagoela, segundo gehiagotara, baina hor dago, eta egia esan itsasoaren baldintzen arabera edonork irabaz dezake”. Zaleentzat izan ditu azken hitzak Hibaikakoak: “Babes handia suposatzen dute zaleek, eta gertatzen dena gertatzen dela hor daudela ikusten dugu, babestuko gaituztela eta gurekin egongo direla”.
