Auzoak dituen arazoak eta hutsuneak argitara atera nahi dituzte auzotarrei protagonismoa emanda.
Larunbatean antolatu du jardunaldia egun osorako Gurekin Auzo Elkarteak.
Iztieta-Ondartxoko Gurekin Auzo Elkarteak jaia eta aldarrikapena uztartuko dituen ekitaldia antolatu du larunbaterako. Auzoak dituen arazoak eta hutsuneak argitara atera nahi dituzte auzotarrei protagonismoa emanda. Ongi komunikatutako auzoa, zerbitzu maila ona duena eta bizia dela dio auzo elkarteak baina urteetan erantzunik izan ez duten arazoak bere horretan jarraitzen dutela gaineratu du. Besteak beste, segurtasun eza nabarmendu du auzo elkarteak, “gertaera larriak izan dira auzoan, eta arduradunak inpunitate osoarekin berehala daude berriro kalean”.
Aparkaleku falta eta auzoak jasaten duen trafiko zama eta zaborrak, altzari bilketa eta mantenua dira aipatu dituzten beste arazoak: “Altzariak botatzeko ordutegia errespetatzen ez duten beste herrietako pertsonak etortzen dira autoarekin gure auzora horiek botatzera, edo txakurren kaka jasotzen ez duten jabeekin ere arazoa dago auzoan”. Mantenu lanen harira berriz, Iztietako pasealekuko zuhaitzen adarrak ez dituztela mozten, pizten ez diren farolak daudela eta hainbat gune ilunpean gelditzen direla salatu du elkarteak.
Larunbatean, jaia eta aldarrikapena uztartuta, bizilagunen iritzia jaso nahi duela dio elkarteak, “auzokide bakoitzak iritzi bat izango du, denek dute balioa, eta jaso egin nahi ditugu”. Horretarako informazio mahaiak izango dira auzoan eta baita egitarau zabala auzotarrei begira ere: haurrentzako jolasak, txokolate jatea, elkarretaratzea Matadero gunean, musika eta afaria. Gurekin elkarteak auzotar guztiak ditu ditu parte hartzera eta ekarpena egitera.
Egitaraua:
- 12:00: Txupinazoa eta jardunaldiaren hasiera. Jai Tokik antolatutako Flashmoba eta jarraian sorpresaz betetako ur jolasak eta aparraren festa Mataderoan.
- 17:00: Ping Pong txapelketa (jaietan bertanbehera utzitakoa).
- 17:30: Haurrentzako txokolate jatea.
- 18:00: Patinatzen ikasi A.P.Gren eskutik. Kaskoa eta babesak derrigorrezkoak. Freestyle erakusketa: Alain Irazu, Manuel Sanmartin eta Reda Touzanirekin.
- 20:00: Mataderoan elkarretaratzea. Mahai informatiboetan jasotako auzokideen eskarien irakurketa, udalari zuzenduta.
- 20:15: Musika.
- 22:00: Itsaski jatea Batasuna elkartean (25 euro). Eta ordu txikiak arte musika eta dantzaldia.
- Egun osoan zehar auzoko arazoen berri emateko informazio mahaiak. Horietan auzotarren ekarpenak jasoko dituzte, bestalde.
