Bizikleta festa, bigarren eskuko bizikletaren merkatua, eta bizikletan ibiltzen ikasteko helduei begirako doako ikastaroa antolatu ditu udalak.
Geroz eta pertsona gehiagok erabiltzen dute bizikleta lanera edo ikastera joateko.
Hilaren 16tik 26ra bitartean Mugikortasun Iraunkorraren Europako Astea egingo dute
Partekatzeak urrutiago eramango zaitu leloarekin, eta bat egin du beste urtebetez Errenteriako Udalak. Horren harira, bizikleta festa, bigarren eskuko bizikletaren merkatua, eta bizikletan ibiltzen ikasteko helduei begirako doako ikastaroa antolatu ditu. Kirola eta Ingurumen sailek antolatu dute astea, ibilgailua hirian erabiltzeak osasun publikoan zein ingurumenean eragiten dituen kalteak agerian jarri eta herritarrak sentsibilizatzeko, batetik, eta garraiobide iraunkorrak dituen onurak azalarazteko, bestetik.
Iaz onartu zuen udalak Oinezko eta bizikleta bidezko Mugikortasun Plana: “Helburua bizikletaren erabilera sustatzea da, neurriak jarrita horretarako eta bidaien %1etik %5era jauzia egiteko. gaur egungo sarea 12 kilometrotik 25 kilometrora zabaldu nahi da gainera”.
Bigarren eskuko bizikletaren merkatua ostiralean egingo dute. Herritarrek bertara jotzea izango dute saldu nahi duten bizikletekin edo mugikortasunarekin lotutako objektuekin, eta azokan salduko dizkiete bertan izango diren saltzaileek. Ez da 300 euroko baino gehiagoko salneurririk onartuko. Azoka 16:30etik 20:00etara izango da zabalik eta bizikletak edota bestelako mugikortasunerako objektuak 15:00etatik 16:30era utzi beharko dituzte interesdunek. Informazio gehiago behar dutenentzat, telefono zenbakia jarri du udalak: 943 67 02 49.
Bizikleta Festa, seigarrenez
Larunbatean antolatu dute Bizikleta Festa eta seigarren ekitaldia izango du honakoa. Errenteria-Orereta barruan egingo den martxa kontrolatua izango da festa, ordu erdi ingurukoa eta Biteri kalean hasi eta bukatuko dena. Bi taldeetan banatu dute, txikienak, 11 urtetik beherako haurrak eta guraso edo laguntzaileak 11:30ean abiatuko dira. 11 urtetik gorakoak berriz, 12:30ean. Doakoa da eta ez da parte hartzeko izena eman behar, baina kaskoa erabiltzea derrigorrezkoa da.
Helduei begira, bizikletan ibiltzeko ikastaroa antolatu du udalak astearen barruan. Doakoa da ikastaro hori ere, eta Galtzarabordako kiroldegiko pistan emango dute hilaren 18tik 21era bitartean bi ordutegitan, 1:00etatik 11:30era eta 12:00etatik 13:30era. izena ematea kiroldegiko harreran egin daiteke bihar arte. Informazio gehiago behar dutenek ikastaroaren gainean, 635 20 24 24 telefono zenbakira deitu dezakete.
