Hemen dira Santakrutzak

Ane Juanarena, Mikel Esnaola, Ibone Alvarez, Ugaitz Ribera, Olatz Azkue eta Iker Belintxon dantzariek piztuko dute suziria gaur 19:00etan.

Ikerne Zarate Gartziarena

Lezo

2017/09/13

Irudi hau errepikatuko da gaur arratsaldean txupinak eztanda egiten duenean.

Ordu batzuk baino ez dira falta txupinak eztanda egin eta Lezo jaietan murgiltzeko. Ane Juanarena, Mikel Esnaola, Ibone Alvarez, Ugaitz Ribera, Olatz Azkue eta Iker Belintxonek piztuko dute suziria. Guztiak dantzariak dira eta aurten sariren bat eskuratu dute. Pregoia berriz, Iker Goikoetxea eta Paula Mitxelena alkate txikiek irakurriko dute. Hortik aurrera bost eguneko festa eta 67 ekitaldi gozatzeko. Gaur, danbor hotsak nagusituko dira. Ixkulin, Alerru, Altzate eta Tiñeluko lagunek, 500dik gora danbor astinduko dituzte gogoz. Lehenengoz, gainera, Lezoko Herria ereserkia batera joko dute Gurutze Santuaren plazan 23:45ean. Bihar izango da festen egun handia, Santakrutz Eguna, edo i14. tartekoek eta Arrantzaleek girotuko dituzte kaleak eta ondoren bazkariak egingo dituzte Karlos Saldise plazan lehenek, eta Bekoerrota Kiroldegian bigarrenek. Jaiak errespetutik gozatzera deitu dituzte herritarrak zein beste lekutatik heltzen direnak, indarkeria matxistarik ez duelako onartuko Lezok. Eraso sexistarik gabeko jai parekideak nahi dituzte, eta horretarako deia egin dute udaletik: “Gauez zein egunez lasai kalera irten eta jaiez, gizonek bezalaxe, disfrutatzeko aukera izan dezagun, etxera bidean beldurrik izan gabe edota iraingarriak izan daitezkeen hitzik edota egoerarik jasan beharrik gabe”. Horrelako egoerak gerta ez daitezen, udalak eraso sexisten aurkako kanpaina berezia prestatu du. Kartelak herrian barrena eta pankarta udaletxeko balkoian jarri dituzte. Horrekin batera, hiru trafiko seinale jarri dituzte Lezok ez du eraso sexistarik onartzen leloarekin Lezoko sarrerako biribilgunean, erdialdean eta Donibanerako irteeran. Amaitzeko, eraso bat ikusi, entzun edo jasanez gero, erantzuteko eta salatzeko eskatu die udalak herritarrei. SANTAKRUTZAK 2017 [Egitaraua]

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.