Langabeek, diru sarrerak bermatzeko errenta, eta gizarte larrialdietarako laguntza jasotzen duten herritarrek doan izango dute euskara ikastea.
Ostolaza, Lopez Etxezarreta, Arbelaitz eta Amundarain.
Euskara ikastea doakoa eta unibertsala izatea du helburu Errenteriako Gobernu Taldeak. Hala esan du Garazi Lopez Etxezarreta Euskara zinegotziak, udal euskaltegiko Ane Amundarain eta AEKko Borja Arbelaitz eta Josu Ostolazarekin batera egin duen agerraldian. Hori ez dela egun batetik bestera lortzen esan du Lopez Etxezarretak, baina bide horretan udala urratsak egiten ari dela gaineratu du.
Horren adierazle, gaurkoan aurkeztu duten urrats berria plenoak formalki gaur arratsaldean aztertuko duena, eta ordentza fiskaletan eta beka sisteman erabateko doakotasuna eskainiko diena langabezian, diru sarrerak bermatzeko errenta edota gizarte larrialdietarako dirulaguntzak jasotzen dituzten herritarrei. baldintza, Errenterian erroldatuta egotea. “Pertsona horientzat gure herrian euskara ikastea doakoa izango da 2017-2018 ikasturtetik aurrera”, azaldu du Lopez Etxezarretak.
Orain arte, langabetuek zuten doan ikasteko aukera, baina matrikularen zati handi bat aurretatu behar zuten. Ikasturte honetatik aurrera berriz, langabetuekin batera, diru sarrerak bermatzeko errenta eta larrialdietarako dirulaguntzak jasotzen dituztenei zabaldu die aukera udalak. Ez dute, gainera, dirurik aurreratu beharko, udalak zuzenean ordainduko dio matrikularen %80a izena emandako euskaltegiari, eta gainontzeko %20a, ikasturte amaieran, ikasleak %85eko asistentzia bermatzen duenean.
Ez da aldaketa bakarra. Orain arte ikastaro trinkoetan aritu dira langabe taldeetako ikasleak, eta ikasturte honetatik aurrera, trinko edo intentsiboetan, zein ohikoetan izena emateko aukera izango dute. Orain arte bezala, edozein euskaltegietan egiteko aukera izango dute, udal euskaltegian zein Xenpelar AEKn, eta baita herritik kanpokoetan ere.
Udala, aitzindari
Xenpelar AEK Euskaltegiko ordezkariek, doakotasuna bermatzeko egindako “esfortzua” eskertu diote udalari. Fruituak izango dituen zalantzarik ez dute, gainera, “aukera emango zaie langabeei euskalduntzean aurrera egiteko, eta hori lan merkatuan tartea bilatzeko lagungarri izango zaie”. Errenteriako Udalaren “aitzindaritza” papera nabarmendu du Arbelaitzek: “Langabeen taldeak sortzeko garaian lehena izan zen, eta gerora eskualdera zabaldu zen. Orain ere, erabateko doakotasun sistema hau berritzailea da, eta eskualdeko gainontzeko herrietara zabaltzea espero dugu”.
“Pausu garrantzitsutzat” definitu du bere aldetik Amondarainek, udalak emandakoa, “fruituak ematen ari da, eta ikasleek oso harrera ona egin diote”.
Orain arteko ikastaroetan 70 bat lagun, bina talde bi euskaltegietan aritu direla esan du Etxezarretak, “kopuru hori zabaltzea espero dugu neurri berriarekin”.
Hainbat datu ere eman dituzte laguntzen gainean. Udalak, 43.000 euroko inbertsioa egin zuen langabe taldeak euskalduntzeko 2015 urtean; iaz, 71.317 euro inbertitu zituen; eta aurten, 96.000 euro inbertitzea aurreikusi du, “kopuru hori gehiago edo gutxiago izan daiteke izena ematen duten ikasleen arabera”. Matrikula, urriaren 14ra arte egiteko aukera izango dute.
Langabeek euskara ikasteko laguntzak Oarsoaldean
- Oiartzun: Diru laguntza aurreratzen zaie ikasle guztiei eta gehienez %70a laguntzen da diruz.
- Pasaia: Ikastaroa amaitzean ematen zaie dirulaguntza ikasleei eta %100 laguntzen da diruz.
- Lezo: Ikastaroa amaitzean ematen zaie dirulaguntza ikasleeieta %100 laguntzen da diruz.
- Errenteria-Orereta: Diru laguntza aurreratzen zaie ikasleei eta %100 laguntzen da diruz. Langabeez gain, diru sarrerak bermatzeko errenta eta gizarte larrialdietarako dirulaguntzak jasotzen ditzuten prestonek ere laguntza hori jaso dezakete.
