Ondarearen Europako Jardunaldiekin bat egin du Errenteriako Udalak, eta horren harira urrian ondarearekin lotutako hamabi bisita antolatu ditu.
Ondarea hurbiletik ezagutzeko hamabi bisita gidatu antolatu dituzte.
Ondarearen Europako Jardunaldiekin bat egin du Errenteriako Udalak, eta horren harira urrian ondarearekin lotutako hamabi bisita antolatu ditu. Gaur eman dute horren berri, Garazi Lopez Etxezarreta eta Jose Cruz Legorburu artxibo eta argitalpenetako, eta ingurumen zinegotziak hurrenez hurren, Jon Bagues Eresbileko zuzendariak, eta Javier Busselok Felix Ugarte Elkartearen ordezkariak. Gipuzkoako ondarearen gaineko liburua argitaratu berri du Gipuzkoako Foru aldundiak, eta bertan, besteak beste Errenteria-Oreretako ondarearekin lotutako zortzi ekintza bildu ditu.
Elkarlanean antolatu dituzte ekintza horiek Errenteriako Udalak, Eresbilek, Felix Ugarte elkarteak eta Oarsoaldeko garapen Agentziak. Helburua, kultur ondarearen gaineko sentsibilizazioa areagotzea. Paisaia, iragan industriala, ondare naturala,musika… askotariko aukerak bildu dituzte.
Umeek parte hartzen dituzten bisitak euskaraz egingo dituzte.
Iragan industrialaren bisita da antolatutako bat. Urriaren 7an (euskaraz) eta 8an (elebitan) egingo dituzte, 10:30etik 11:30era. 5 eta 12 urte arteko haurrak dituzten familiei zuzenduta dagoen bisitan hiribilduaren iragan industriala eta industrializazioak XIX eta XX. mendeetan herriari eragindako transformazioa era entretenigarrian ezagutzeko pista jokoa.
Mantxester txikira bidaia da beste aukera. Urriaren 7an (euskaraz) eta 8an (gazteleraz) egingo dituzte. Industrializazioak herriarentzat suposatu zuena azalduko dute bisita horretan, eta planoaren gainean kokatuta industriek hartzen zuten lekuetara hurbilduko dira. Industria nagusiak, garaiko lan baldintzak, emakumeen papera garai hartan eta hirigintzak horrek sortutako aldaketak azalduko dituzte.
Erdi Aroa eta Alde Zaharra eskutik eskura ezagutzeko aukera emango du beste bisita batek. Urriaren 21ean (gazteleraz) eta 22an (euskaraz) egingo dituzte 12:00etatik 13:30era. Baina egun beretan 10:30etik 11:30erapista jokoa egingo dute 5 eta 12 urte arteko umeak dituzten familiekin arkeologia eta azken urteetan Errenteriako kasko historikoan azaldu diren ondare ale ezberdinak modu entretenigarrian ezagutzeko.
Baso erreserba eta ondare megalitikoa
Natur ondarea eta ondare megalitikoa hurbiletik ezagutzeko aukera emango duten beste hiru bisita gidatu antolatu dituzte. Añarbeko baso erreserba ezagutzeko izango da bata urriaren 1ean, 10:00etan); Lau Haizeta parkea eta Txoritokietako estazio megalitikoaren paisaiak ezagutzeko, bestea (urriaren 8an, 10:00etan); eta Aizpitarteko leizeen gainekoa izango da hirugarrena. Aukera paregabea eskainiko du gainera, kobazulo horiek itxita daude bertan paleolito garaiko arte parietala aurkitu zutenetik. Urriaren 15an, kobazulo horietan, edo horien sarreran bertan izateko aukera izango dute bisita gidatu horretarako izena ematen dutenek, eta bertatik bertara ezagutzeko adituen eskutik bertako aurkikuntzen gainekoak. Goi paleolitoaren “santutegi” gisa definitu du Busselok, “Europako erreferentea, eta garai horretako Euskal herriko aztarnategia”.
Eresbilek ondarea musikatuko du. Musikaren Euskal Artxiboak ere eskainiko du bisita gidatua. Urriaren 28an 11:00eta egingo du bista hori, eta bertan, Ricardo Isasiren gitarrarako lanak aurkeztuko ditu eta gitarrarekin erlazionatutako bi funtsa ere erakutsiko ditu: Oñatiko Kortabarria funtsa, eta Angel Segura funtsa.
Jarduera osatzeko, Jose Azpiazuren gitarra eta pultsatutako harizko musika tresnen bilduma ikusi eta entzuteko aukera izango dute bertaratzen direnek.
Bisita guztietan parte hartzeko izena eman behar da. Eresbilen bisita gidatuaren kasuan, musika artxiboko 943 00 08 68 telefono zenbakira deitu behar dute interesdunek edo
posta elektronikora mezua bidali.
Beste guztietarako, Oarsoaldeko Turismo bulegoaren 943 49 45 21 telefono zenbakira deitu, edota
posta elektronikora mezua bidali behar dute.
