Garabi zerbitzuko langile ohien birkolokazio plana martxan da

Planaren bidez pertsona horiei babesa eman, lana bilatzen lagundu, eta lehenengo urteetan akonpainamendu lana egiten lagundu nahi dietela esan du udalak..

Ikerne Zarate Gartziarena

Errenteria-Orereta

2017/09/29

Udalak jakinarazi du garabi zerbitzuko langile ohiei begirako birkolokazio plana martxan dela.

Garabi zerbitzua eskaintzen zuten langileei begirako birkolokazio plana martxan dela jakinarazi du udalak. TAO zerbitzuarekin batera, garabiarena ere publiko egiteko erabakia hartu du udalak. Garabiaren kasuan dagoeneko eten du zerbitzua enpresak. Langileekiko ardurak, TAO zein garabi zerbitzua ematen duten enpresena dela esan du hasieratik udalak, “baina ardura morala” duela instituzioak nabarmendu. Horren harira, bi zerbitzuetako langileei begira birkolokazio plana proposatu du. Garabi zerbitzuko langile zirenen kasuan, abiatu du dagoeneko plan hori, Oarsoaldea Garapen agentziarekin batera. TAOko langileekin ez du abiatu oraindik ez dutelako lortu adostasunik. Astearteko plenoan, TAOko langileek mozioa aurkeztu zuten, eta hura izan zen eztabaida punturik luzeena. Julen Mendoza alkateak, dei egin zien langileei, birkolokazio plana aztertu eta mahaiaren bueltan esertzera “egin beharreko hobekuntzak egin, eta ahalik eta azkarren abiatzeko”.

Planaren bidez pertsona horiei babesa eman, lana bilatzen lagundu, eta lehenengo urteetan akonpainamendu lana egiten lagundu nahi dietela esan du udalak.

Planaren lehen fase batean pertsona bakoitzaren diagnostiko bat egingo dute adituek bere enplegagarritasuna aztertzeko, bere lan ibilbidea, formazioa eta abar. Pertsona bakoitzaren profilaren arabera prozesu hori formazio okupazionalaz ere lagunduko da beraien profila hobetze aldera. Horretarako, diru laguntza konkretuak onartu dituzte :”Oarsoaldeak, dena den, pertsona horien profila hobetzeko ardura hartzeaz gain, Enplegu Plana oinarri hartuta, inguruko enpresak aztertuko ditu pertsona bakoitza lanpostu konkretu batera bideratzeko”. Pertsona horiek kontratatzen dituzten enpresek 18.000 erora arteko hobaria jasoko dute langileko, hiru urtez, beti ere, kontratuak enplegu egonkorra sortzera bideratuta badaude.

Gainera, prozesua ahalik eta gardenena izan dadin batzorde bat eratuko dute. Langile bakoitzaren birkokatze planaren baldintzak betetzen diren jarraipena egingo du. Bertan, Oarsoaldea Garapen Agentziaren ordezkari bat, udal ordezkari bat, eta planean parte hartuko duten langileek aukeratutako ordezkari batek hartuko dute parte.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.