Lezoko Udalak Katalunia babestu du

Katalunia egunotan bizitzen ari den egoera izan zuten atzo hizketagai iraileko ohiko udalbatzarrean. EAJk eta EH Bilduk adostutako mozioa onartu egin zen.

Urko Etxebeste Petrirena

Lezo

2017/09/29

Joan den astean herritarrek Kataluniaren alde egindako elkarretaratzea.

Kataluniako bandera jarrita dago Lezoko udaletxean. Atzo hartu zuten erabakia, udalbatzarrean, Lezoko zinegotzien gehiengo ia osoak. Mozio bidez hartu zuten erabakia, EAJk eta EH Bilduk adostutakoa hori. Bandera jartzea erabakiaren arlo bisuala da. Mamiz bete zuten mozioan bi alderdiek Kataluniaren aldeko mezua. Onartutako mozioaren testuan agertzen denez, Kataluniako galdeketari babesa adierazteaz gain, azken egunetan Espainiako Estatuko indar polizialek egin dituztenak gaitzesten dituzte, horien artean, Genelaritateko kideen atxiloketak; “errepresio estrategia” baten barruan kokatu dituzte horiek. Gainera, demokratikoki hautatuak izan diren 700 alkate epailearen aurrera deklaratzera joateko erabakia ere “irmoki” gaitzetsi du Lezok, alkate horien asmoa “demokrazia praktikan jartzea” dela argudiatuta. Hartara, Lezoko Udalak printzipio demokratikoekin bat egiten duela adostu zuten atzoko udalbatzarrean, eta babesa eta elkartasuna agertu die “Kataluniako herriari eta baita demokraziaren aurka Espainiako Gobernuak gidatutako errepresio politikoa pairatzen ari diren pertsona eta erakunde guztiei”. Beste gaiak Kataluniari buruzko mozioaz gain, izan ziren gehiago atzoko plenoan. Adibidez, “kale garbiketa esleitzeko prozesua azkartze aldera”, zerbitzuaren kontratazioaren ardura gobernu batzordearen esku uztea onartu zen. Hainbat zinegotziren dedikazio aldaketen proposamenak ere aurrera atera ziren.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.