[Galeria] Izar Etxeberria eta Beñat Salegi gailendu dira Soinu Zahar eta Aurreskuan

Hegoi Belategi

2017/10/02

Izar Etxeberria eta Beñat Salegi nagusitu ziren Ibaiondo frontoian

Pasai Antxoko Ibaiondo frontoiak, Gipuzkoako Aurresku eta Euskadiko Soinu Zahar txapelketak hartu zituen larunbatean. San Fermin Txikien egun handian, bi sari nagusiak Oarsoaldean gelditu ziren. Izar Etxeberria oiartzuarra Soinu Zaharrean gailendu da bosgarren urtez. Hamaika neska aritu zien lehian orotara, Euskadiko XI. Soinu Zahar Txapelketan eta Etxeberriak jantzi zuen txapela. Horrez gain, Dantzarien Biltzarreko trofeoa, Kutxaren trofeoa eta gerrikoa eskuratu zituen oiartzuarrak, 350 euroko diru sariarekin batera. Gainera, Koldobika Jauregi eskultoreak eginiko Enborra tenteka oroigarria, Oiartzungo udaletxean gordeko dute hurrengo dantzaldira arte. Etxeberriarena ez zen izan oiartzuarrek lortutako garaipen bakarra, Katerin Artolak bigarren lekuan bukatu zuen eta. Nerea Sasiain elgoibartarra hirugarrena izan zen. Euskadiko XXXVII. Gipuzkoar Aurresku Txapelketa ere ospatu zuten Ibaiondon. Errenteriako Beñat Salegi gazteak irabazi zuen txapela larunbatean, lehenengoz. 350 euroko sariaz gain, Dantzarien Biltzarreko saria, Kutxaren saria eta gerrikoa ere eskuratu zituen Salegik. Oiartzunen bezala, urte batez trofeoa zaintzeko ohorea izango du Errenteriako Udalak, Tomas Murua trofeoa alegia. Iker Sanz Lezoarrak bigarren saria lortu zuen eta Ibarrako Aimar Odriozolak hirugarrena. Dantzari gazteenen abileziak ere izan ziren ikusgai Pasai Antxon. Epaimahaiak erabakia hartzen zuen bitartean, Soinu Zahar eta Aurresku txapeldunen erakustaldia egin zuten, zazpi eta hamabost urteko arteko hainbat dantzarik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.