Autodefentsarako deia egin du mugimendu feministak

Eraso matxisten aurrean, autodefentsarako deia egin du mugimendu feministak, "hori da gure hautua, eta horretan jarraituko dugu indarkeria matxista gure eguneroko ogia izaten den bitartean".

Ikerne Zarate

Errenteria-Orereta

2017/10/03

Ehunka lagunek salatu dute eraso matxista.

Ehunka lagunek egin dute bat mugimendu feministak joan den asteazkenean Errenteria-Oreretako emakume bat bortxatu zutela salatzeko deitu duen manifestazioarekin. “Haserre, nazkatuta eta amorruaz gainezka” azaldu dira: “Atzo Noelia Noemiren hilketa salatzen ari ginen eta gaur, berriz ere, hemen gaude, gure herrian gertatu den bortxaketa baten aurrean tinko”. Argi diote, autodefentsa da eraso matxistei aurre egiteko bidea: “Hori da gure hautua, eta horretan jarraituko dugu indarkeria matxista gure eguneroko ogia izaten den bitartean”. Erakundeek bultzatzen dituzten neurri asistentzialekin konformatzen ez direla gaineratu dute, bidea luzea dela jakitun diren arren, eta bide polizialez eta neurri zigortzaileez gain, bestelako jarrera, ekintza eta neurri eskatu dituzte, “politika errealak”. Kalea aldarrikatu dute espazio propio bezala, auzo eta herrietan libre ibili nahi dutelako, eta bide horretan espazio guztiak hartzera deitu dute, “plazak, kaleak, udalak, komunak, antzokiak… Nonahi, noiznahi, nolanahi, bide eta espazio guztietan libreki mugitzeko eskubidea aldarrikatzen dugu ozen”. Erasoen aurrean “kikildu” edo “isiltzeko” asmorik ez dutela esanda, autodefentsan sakontzeko konpromisoa berretsi dute “indibidualki zein kolektiboki, erasotzaileak izen abizenekin ezagutu eta gure kaletatatik baztertu eta kanporatu arte, ez dugu etsiko”. Mugimendu feministak deitutako manifestazioarekin bat egin du Errenteriako Udalaren Bozeramaileen Batzarrak, eta gaur bertan, adierazpen instituzionala egin du.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.