Orain arte baino bi ordu gehiagoz izango da zabalik liburutegia hasi berria den ikasturtean, 16:00etatik 20:00etara zehazki.
Bizarain liburutegiak ordutegia eta eskaintza zabaldu ditu.
Berrikuntza ugarirekin eta ordutegia zabalduta dator ikasturte berrira Bizarain Ikastolako liburutegia. Gaur aurkeztu dute programazioa Garazi Lopez Etxezarreta zinegotziak, Mari Jose Pascual Udal Liburutegiko Zuzendariak, Belen Ugalde Bizarain Ikastolako zuzendariak eta Karmele Benavides liburuzainak.
Orain arte baino bi ordu gehiagoz izango da zabalik liburutegia hasi berria den ikasturtean, 16:00etatik 20:00etara zehazki. Helburua, erabiltzaile gehiagori sarbidea erraztea da. Eskaintzari dagokionean, aurreko ikasturtean bezala, irakurketa klubak eta ipuin kontaketak hartuko ditu Beraunen kokatutako liburutegiak. Berrikuntzak izango dira, bestalde, garrantzitsuena Galtzagorri elkarteak bertan antolatutako erakusketa izango da. Foru aldundiak lagunduta
Adur, Adur, ez naiz zure beldur aretoa aurkeztuko dute, 8 eta 10 urte arteko haurrei begira. Bertan eskainiko diren saioek, besteak beste, haur literaturan beldurraren trataera ezagutzea, , barruko eta kanpoko mamuak lantzea, eta haurrek beldurrari aurre egiteko literaturak eskaintzen dizkien tresnak ezagutzea dute helburu.
Azaroaren 6tik 17ra, goizetan, eskolei zuzendutako hamar saio antolatuko dituzte. Aurretik eskolei gonbidapena eta egutegia bidaliko zaie, interesa badute bisita ordua eska dezaten.
Arratsaldetan berriz, erakusketa publiko orokorrari zabalik egongo da, eta bisitariek erakusketa lantzen duen gaiari buruzko irakurketa gomendioak kontsultatu ahalko dituzte. Eskaintza “interesgarria” dela esan du Lopez Etxezarretak: “Berrikuntza hauekin Bizaraingo liburutegia Udal Liburutegiaren sukurtsala izatea da helburua, eta liburutegi publikoak eskaintzen dituen zerbitzu guztiak Bizarainen ere eskaintzea”.
Buzoia eta helduen funtsa
Beste berrikuntza buzoiarena da. 24 orduz liburuak utzi ahal izango dituzte bertan erabiltzaileek. Liburua itxita dagoenean ere etxera eramandako materiala entregatzeko aukera ematea da helburua.Helduentzako eleberriz osatutako funts txiki bat ere prestatu dute. Bestalde, udal liburutegian liburuak eskatu eta Bizarainen jaso daitezkeela gogorarazi dute azkenik.
Ipuin kontaketa saioak (9-11 urte arteko haurrentzat)
- Hilaren 25ean, Mila gau eta bat gehiago.
- Martxoaren 8an, Emakumeak eta itsasoa.
- Maiatzaren 7an, Animalien kondairak.
