Bono berria atera dute museoek, eta Ondarearen Europako jardunaldien barruan hiru ekintza antolatu dituzte elkarlanean hilabete honetarako.
Gaur aurkeztu dute Oarsoaldeko zortzi museoen bonoa eta antolatu dituzten jarduerak.
Oarsoaldeko zortzi museoek elkarlanean antolatu dituzten jarduera eta produktuak aurkeztu dituzte gaur goizean Errenteria-Oreretako Jantziaren Zentroan. Jexux Leonet Oiartzungo alkate eta Oarsoaldea Garapen Agentziako lehendakariak, Joseba Zabaleta Soinuenea museoaren ordezkariak, Erme Pedroso Albaola Itsas Kultur Fundazioaren ordezkariak, eta Maria Jesus Telleria Gipuzkoako Foru Aldundiko Kultura zuzendariak egin dute aurkezpena.
2014 urtean Oarsoaldeko museoen mahaia jarri zutela martxan esan du Leonetek, “horren bidez, urte osoan zehar eskualdeko museoek hainbat jarduera egiten dituzte elkarlanean”. Elkarlan horren fruitu diren bi iniziatiba aurkeztu dituzte, zehazki: zortzi museo sarrera bakarrarekin bisitatzeko aukera da bata; Ondarearen Europako jardunaldien barruan antolatu dituzten jarduerak, da bigarrena.
Bono berria atera dute museoek. Ez da produktu berria, baina Jantziaren Zentroaren sorrerarekin, hura moldatu eta orain arteko eskaintzari zentro berria gehitu diote. Bonoak, zortzi museoak erdi prezioan bisitatzeko aukera emango du, eta 12,50 euroren truke, San Marko gotorlekua, jantziaren Zentroa, Arditurri Meatze gunea, Luberri geologia museoa, Soinuenea Herri Musikaren Txokoa, Alabola Itsas Kultur Faktoria, Mater museo ontzia eta Victor Hugo Etxea bisitatu ahalko dira urtebeteko epean. Bonoak, museoetan eta Pasaia eta Errenteriako turismo bulegoetan eros daitezke.
Jarduerak ondareari begira
Museo bakoitzak identitate propioa eta gai ezberdinak jorratzen baditu ere, hori ez dela eragozpena beraien arteko elkarlanerako nabarmendu du Leonetek: “Arlo ezberdinak uztartuta, beraien arteko sinergiak sortzeko gai izan dira”. Horren adierazle da Ondarearen Europako jardunaldien barruan antolatu dituzten ekintzak. Lehena larunbatean izango da, Arditurrik eta Soinuenean elkarlanean antolatutako
Gaskoinia eta Euskal Herriko herri musika jarduerarekin. Oiartzungo Ergoien auzoaren paisaian azken urteetan eman diren aldaketak ezagutzeko egun bateko egitaraua prestatu dute. Goizean, Katua dantzarako tailerra egingo dute Arditurrin eta meategian bisita doan egiteko aukera eskainiko dute. 18:30ean Soinuenea ondoan dagoen Auzokalte elkartean udazkeneko kontzertua Joan Frances Tisner eta Alan Griffin musikarien eskutik. Azken horretarako 5 euro balio ditu sarrerak, eta sarrera eta afariak berriz, 20 euro.
Hilaren 22an, Luberri ikasgune geologikoak eta Mater Museoak
Jaizkibelgo paisaia eta bertako itsasertza ezagutzeko aukera emango dute. Hilaren 28an egingo dute azken jarduera,
Albaola itsas kultur faktoriaren ontzigintza Soinuenean, Albaola eta Soinueneak antolatuta. Pasaiako Itsas Kultur Faktoria Oiartzun herrira joango da, itsas ondareak barrualdean duen garrantzia erakusteko. Soinuenean 15:00etatik aurrera arotzak lanean ikusteko aukera izango da San Jaun baleontziko haritzezko piezak landuko baitituzte jendaurrean. 17:00etatik aurrera berriz, haurrek egurrezko itsasontzi txikiak modu dibertigarrian egiteko aukera izango dute.
Ikastaroetan parte hartzeko izena eman behar da aurretik Errenteriako Turismo bulegoan, 943 49 45 21 telefono zenbakira deituta, edo
posta elektronikora mezua bidalita.
