Edukiontziak era egokian erabiltzeko deia egin du Lezoko Udalak

Edukiontziak hainbat herritarrek ez dituztela egoki erabiltzen adierazi du udalak. Errespetuz eta gizalegez jokatzeko eskatu die lezoarrei.

Urko Etxebeste

Lezo

2017/10/13

Edukiontziak, Altamira auzoan.

Lezoko Udalak, duela aste batzuk herri osora hedatutako hondakinak biltzeko bost edukiontzien sistema era egokian erabiltzeko deia egin die lezoarrei. “Badirudi zenbait pertsonek ez dutela aldaketarekin bat egin nahi, eta jarrera horrek arazoak sortu ditu bilketa puntu batzuetan”, zehaztu du udalak. Horren harira, sistema ondo erabiltzeko udalak hainbat bide herritarren eskura jarri dituela oroitarazi du. Hondakinak modu egokian sailkatzen ez dituztenek, ondo birziklatzen dutenen lan eta esfortzua kaltetzen dutela esan dute. Udalaren ustez, horiek “gauzak ondo egin nahi ez dituztenak” eta “sistema ukatu nahi dutenak” dira: “Ez da bidezkoa hondakinak gaika modu egokian sailkatzen eta ateratzen jarraitzen duten herritarrek edukiontzien kanpoaldean poltsak aurkitu behar izatea”. Herritarrei erantzukizunez jokatzeko eskatu die udalak, “ez du balio sistemak emaitza onak bermatzen ez dituela esatea, norberak bere esku dagoena egiten ez badu eta sistema modu egokian erabiltzen ez bada. Norbera bere etxean sortzen dituen hondakinen erantzule da, edozein delarik ezarrita dagoen sistema”. Udalak berretsi du sistema berria erosoagoa eta erabilerrezagoa dela atez atekoa baino.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.