Inauteri bereziak nahi dituzte Trintxerpeko Korkoiburuek

Korkoiburuek hiru gairen artean botoa emateko aukera eman diete herritarrei, eta irabazten duenarekin, Trintxerpe mozorrotzeko deia egin dute.

Urko Etxebeste Petrirena

Pasaia

2017/10/14

Kolore are bereziagoa eman nahi diete 2018an Korkoiburuek Trintxerpeko inauteriei.

Goiz hasi dira lanean Trintxerpeko Korkoiburuak inauteriak prestatzen. Pasaiako barrutian otsailaren 17 eta 18an ospatuko dituzten arren, jada bertan hain berezia den festa aroari izaera berezia emateko lanean hasi dira gazteak. Eta proposamen bat dute: Trintxerpe osorako gai bat jartzea. Proposamena egin bakarrik ez. Aukerak eman dizkiete herritarrei gaiaz hitz egiteko eta erabakitzeko. Eta aukera horien artean demokrazia ariketa burutu nahi dute: herritarrei aukera eman nahi diete, hiru gairen artean, erabakitzeko. Hau da, Korkoiburuek landu dituzten hiru gairen artean botoa eman, horietatik boto gehien jasotzen dituenak irabazi, eta horrela mozorrotuko dute barrutia, herria apaindu eta alaituko dute. Azaroaren 2ra arte dago botoa emateko aukera.

Korkoiburuek egin duten kartela, proposamenekin.

Hiru gaiak ondokoak dira, Korkoiburuek emandako azalpen eta guzti:

Zirkua: “Aspalditik zirkua etorri izan da Trintxerpera: malabaristak, lehoiak, pailazoak, dantzariak, magoak, elefanteak… Jaun-andreok, aurten ere inauterietan badator zirkua! Herria koloreztatu eta magia ekarriko dute gurera!”.
Itsasoa: “Aurtengo inauterietan Pasaiako portuko itsasoa Trintxerpen lurreratuko da. Mila espezieetako arrainak, olagarroak, algak, itsasontziak eta marinelak dantzan ikusiko ditugu. Itsas haizeak ekar dezala musika eta festa giroa Trintxerpera!”,
Super-heroiak: “Heldu dira superheroiak Trintxerpeko inauterietara! Bakoitza bere super-botere eta misio-lanekin. Batzuk hegaka edo ikusezin, indartsu besteak. Super inauterietarako prest? Super ondo pasatzeko etorri dira!”.

Horiek hiru aukerak eta azalpenak. Botoa emateko, sakatu Korkoiburuek prestatu duten lotura honetan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.