Berrikuntza eta kalitatea Eskulangintza Azokan

Bihartik igandera arte 35 artisau lantegi ikusteko aukera izango da Merkatuzarren, Euskal Herriko Ereintza Eskulangintza Azokaren barruan.

Ikerne Zarate Gartziarena

Errenteria-Orereta

2017/10/19

Bihartik igandera arte 35 artisau lantegi ikusteko aukera izango da Merkatuzarren, Euskal Herriko Ereintza Eskulangintza Azokaren barruan.

Bihar zabalduko ditu ateak Eskulangintza Azokak hogeita hemeretzigarrenez, eta igandera arte, 35 artisauen lanak ikusteko aukera izango da bertan. Aldaketekin dator, data zein antolaketa aldetik, baina baita, helburuei dagokienean ere: Aurtengo ekitaldian, berrikuntza eta kalitatearen aldeko apustu berezia egin nahi izan dute antolatzaileek. «Aurtengo edizioak izango dituen berritasunek inflexio-puntua suposatuko dute azokarentzat, baita Euskal Herriko eskulangintzarentzat ere. Artisautzaren balorazio soziala eta sona bultzatzea da helburua bere kalitatea eta bikaintasunaren bidez», azaldu dute. Artiola Artisautzaren Guneak antolatu, Gipuzkoako Foru Aldundiak eta Errenteriako Udalak babestu eta Kutxa Fundazioak laguntzen duen Euskal Herriko Ereintza Eskulangintzako Azokan 35 artisau lantegik erakutsiko dituzte beren produktuak. Horietatik 16, lehenengoz izango dira Errenteriako azokan, izan ere, urtero parte hartzen duten tailerren txandatzea eta berrien presentzia sustatuko du Artiolak. Aurten, gehienak gipuzkoarrak (22) badira ere, Euskal Herriko beste herrialdeetatik, eta Espainiako Estatutik heldutakoak ere izango dira. Garrantzi handiko azoka Materialei dagokionean, zura, burnia, bitxigintza, beira, zeramika, ehuna, larrua eta papera lantzen duten artisauen lanak hartuko ditu azokak. Artisautza azoken artean garrantzi handia du Errenteriakoak, «antzinatasunagatik, antolaketagatik eta parte hartzen duten tailerren mailagatik. Bertan parte hartze soilak berrikuntzaren eta sonaren bermea suposatzen du». 11:00etatik 14:00etara eta 16:30etik 20:30era izango da zabalik gaurtik igandera arte. Sarrera, helduentzat, euro batekoa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.