[Bideoa eta galeria] Eskulangintza Azokak zabaldu ditu ateak

Gaur goizean zabaldu ditu ateak Euskal Herriko Ereintza Eskulangintza Azokak hogeita hemeretzigarrenez, lehenengoz Artiolaren eskutik.

Ikerne Zarate Gartziarena

Errenteria-Orereta

2017/10/20

Igandera arte izango da zabalik Eskulangintza azoka.

Gaur goizean zabaldu ditu ateak Euskal Herriko Ereintza Eskulangintza Azokak hogeita hemeretzigarrenez. Lehenengoz Artiolaren eskutik heldu da eta Jone Idiazabalek esan du espero dutela beste hainbeste urtez irautea, eta batez ere urtez urte hobetzen joatea. 35 artisau lantegi eta zura, papera, beira, burnia, zeramika, bitxigintza eta larrua izango dira protagonistak igandera bitarte. Artiola eskulangintza hazi, zabaldu eta garapena landu nahian sortu zela esan du Idiazabalek, “hori gaurkotasuna, diseinua, sormena, inguruarekiko errespetua eta abar luze batekin lortzen da. Eskulangintza beste aukera bat da, bizimodu bat, eta horren alde lanean, hori zabaltzen jarraitzeko asmoa dugu”. Julen Mendoza alkateak Artiola zoriondu egin du egiten duen lanagatik, “garrantzitsua da gure herriko estrategian ere artisautzari indarra eman nahi zaiolako. Artiolak jakin du berrikuntzan aritzen eta baita eszelentzian ere. Azoka aurten zein bere diseinua erabat ezberdina da, eta etengabe berritzen ari dela erakusten du”. Artisauei ere eman dizkie eskerrak eta lanean jarraitzera animatu ditu, “artisautza bere modu eszelentzia handienean ere jartzen jarraitzeko”. Azkenik, ikusleak deitu ditu erostera, “honek jarraituko badu erosten delako izango da eta. Oso ohituta gaude egun kontsumoa berehalakoa, merkea eta balorerik gabe izatea, eta gaur hemen duguna, balorean oinarritutako kontsumo mota bat da”. Antton Tomasena diputatua ere bertan izan da eta lankidetza, parte hartzea, sorkuntza nabarmendu ditu eta baita jasangarritasuna ere. Artisautzarekin lotu ditu horiek denak, eta foru aldundiak sektorea bultzatzeko laguntzak ematen ari dela nabarmendu du: “Gipuzkoan betidanik artisau eta eskulangile apartak irten dira, eta horiek dira babesten jarraitzeko arrazoiak. Baloreak daude batetik, eta bestetik artisau bikainak”. Artiola eta orain arte azoka antolatu duen Ereintza elkarteari eskerrak eman dizkie egindako lanagatik. Berak ere “erostera” deitu du, “sektoreari gehiago lagunduko diogulako horrela”. Azokaren irekiera ekitaldian III Diseinu Lehiaketaren sariak ere banatu dituzte. 50 lan aurkeztu ziren guztira lehiaketara eta lehenengo saria, Mar Cadarso artisauak jaso du Oriente lanarekin. Aipamen berezia, Amalur Urrestik irabazi du Lurra lanarekin. Inaugurazio ekitaldia berezia egin dute Verdini elkarteko dantzariek. 11:00etatik 14:00etara eta 16:30etik 20:30era izango da zabalik gaurtik igandera arte. Sarrera, helduentzat, euro batekoa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.